Búgin Qazaqstan Respýblıkasy Parlamenti Májilisiniń Tóraǵasy Nurlan Nyǵmatýlın Koreı Respýblıkasynyń Qazaqstan Respýblıkasyndaǵy Tótenshe jáne Ókiletti elshisi Desık Kımdi qabyldady, dep jazady Qamshy aqparattyq agenttigi.
Taraptar eki el arasyndaǵy qarym-qatynastyń ózekti jáne parlamentaralyq yntymaqtastyq máselelerin talqylady.
Májilis Spıkeri Koreıanyń – Qazaqstannyń Shyǵys Azıadaǵy strategıalyq mańyzdy seriktesteriniń biri ekendigin jáne eki memlekettiń qarym-qatynasyndaǵy ózara saıası belsendilikti atap ótti. N.Nyǵmatýlınniń málimdeýinshe, Qazaqstan Respýblıkasynyń Prezıdenti Nursultan Nazarbaevtyń 2016 jyldyń qarashasyndaǵy Seýlge sapary jańa strategıalyq seriktestiktiń keleshegine jol ashty.
Óz kezeginde koreıalyq dıplomat Qazaqstan Prezıdenti Nursultan Nazarbaevtyń el órkendeýindegi sarabdal saıasatyn atap ótip, koreı dıasporasyna degen yqylasyna alǵysyn bildirdi.
Ol Astanada ótip jatqan EKSPO- 2017 mańyzyna, Ońtústik Koreıanyń ınovasıalyq múmkindikterine, sonymen qatar, óndiris salasyna, elektrenergıasyn saqtaý men paıdalaný, «jasyl energetıka» men energıa kózderin jańǵyrtý máselelerine toqtaldy.
Desık Kım koreı Úkimetiniń Astanadaǵy halyqaralyq kórmege qyzyǵýshylyǵy jaıyn aıtyp, onyń tabysty ótetinine senim bildirdi.
Áńgime barysynda ıadrolyq qarýsyzdaný men ony taratpaýǵa da nazar aýdaryldy.
Spıker men Elshi júzdesýde eki el parlamentaralyq baılanystaryn nyǵaıtý, Azıa parlamentaralyq Assambleıasy jáne Parlamentaralyq Odaq sheńberindegi baılanystardyń tıimdiligin tilge tıek etti.
