Qyzylorda turǵyny óziniń Facebook paraqshasynda burynǵy kúıeýiniń ózine kórsetken qorlyǵy jaıynda jazyp, onyń qalaı aıaýsyz uryp-soqqandyǵyn áshkere qyldy. «Ajyrasqan» degen atqa iligýden qoryqqan boıjetken mundaı mazaqqa birneshe ýaqyt boıy shydap kelgen, dep habarlaıdy Qamshy aqparattyq agenttigi.
Jámılanyń aıtýynsha, ol kúıeýimen nekede 6 jyl bolǵan. Biraq tek 3 jyl ǵana birge turǵan eken.
«Kúıeýim maǵan birinshi ret qol kótergen kezde baqytym basymnan ushqandaı boldy. Keıinnen meni uryp-soǵýdy ádetke aınaldyrdy. Birneshe ret esimnen tanyp qaldym, erinimdi tilip, qylqyndyratyn, sonan soń qorqyta bastady.
Ol menimen sóılespeıtin, máseleniń mán-jaıyn anyqtap almaı jatyp uryp-soǵýǵa kóshti. Shapalaqpen ursa meıli, shydaýǵa bolatyn shyǵar, biraq ol meni aıýandyqpen aıaýsyz uratyn. Tipti, meni uryp-soqqannan ózi lázzat alatyn sekildi. Sol sebepti de bir aıyrylysyp, bir qosylyp júrdik», - dep jazady ol.
Sonymen qatar, kúıeýi ony aıaǵy aýyr kezinde de soqqyǵa jyqqan eken.
«Balam kemtar bolyp týylady ma dep qatty qoryqtym. Abyroı bolǵanda balam saý bolyp dúnıege keldi. Tek ata-anama qyzdary ajyrasqan degen sóz keledi ma dep shydap júrdim», - dep jalǵastyrady sózin.
Onyń aıtýynsha, ótken jyldyń sáýir aıynda barlyǵyna núkte qoıýǵa májbúr bolyp, ómirinde adam sengisiz oqıǵa bolǵan.
«Úıde urysyp qalǵan kezde onyń ákesi men anasy ony toqtatýǵa tyrysatyn. Bir kúni kúıeýim keramıkalyq sháınekti qabyrǵaǵa uryp syndyrdy da, onyń synyǵyn alyp anasy men ákesiniń qolyn jaraqattady. Osy oqıǵanyń barlyǵyna bizdiń 3 jastaǵy ulymyz kýá boldy.
Keıinnen maǵan tap berdi. Meni ústimdegi jeıdemnen ustap tartyp, qolymdy keskiledi. Sál bolǵanda meniń arterıamdy kesip tastaıtyn edi. Qolyma qarasam qan atqylap, teri astyndaǵy maılardan etim kórinip turdy», - dep eske alady ol.
Sol ýaqytta balasyn alyp, kóshege qashyp shyqqan Jámıla jedel járdem shaqyryp jatpaı, taksı ustap dereý aýrýhanaǵa barǵan.
«Maǵan aýrýhanada alǵashqy medısınalyq kóm ek kórsetip, jaramdy tańyp, tigip tastady. Aýrýhanaǵa polısıa qyzmetkerleri kelip, aryz jazyp berýimdi aıtty. Mundaı jaǵdaıda qandaı jaza qoldanatynyn suraǵanymda, «Eger resmı nekede bolsa, birneshe kúnge qamalady nemese aıyppul tóleıdi» dep jaýap berdi. Demek, birneshe kún ǵana qamalyp shyǵyp nemese aıyppulyn tólep alyp áıelin uryp-soǵýdy jalǵastyra berse bolady eken. Qorǵansyz áıelderge qatysty bizdiń zań nege sonsha álsiz?!» - deıdi Qyzylordalyq boıjetken.
Bul is sotqa deıin jetkenimen Jámıla sot otyrysyna barmaǵan, sebebi moraldyq jaǵynan esh qoldaý kórmegen. Al ol jerde boıjetkendi óziniń aryzynan bas tartady dep sheshim qabyldap qoıǵan eken.
«Munyń barlyǵyn býmerań erejesine qaldyrdym da, ózim ary qaraı ómir súre berdim. Ýaqytynda ketip qalǵanym úshin ózimdi qazir jaqsy sezinemin jáne de barlyq qyz-kelinshekterge osyǵan keńes beremin. Oqıǵa nasyrǵa shappaı turyp barlyǵyna núkte qoıyńyzdar...
Aqyry ajyrastyq. Ol úshin bul jańa ómir bolar, al men úshin tek ajyrasqan degen mór. Adamdarǵa zábir kórsetýshiler únemi ońaı qutylyp ketedi», - dep jazady Jámıla.
Sholýshy: Nazerke Labıhan
