Alımentin tólemeıtin boryshkerler jumyspen qamtý ortalyǵyna shaqyryldy dep jazady almaty.tv. Sóıtip, jumyssyz júrgenderge 2 myńnan asa bos oryndar usynyldy. Tipti arasynda basshylyq laýazymdar da bar. Bos oryndar úmitkerlerdiń shama-sharqyna qaraı tańdalyp, usynylady. Al berilgen jumysqa naqty ornalasý úshin azamattarǵa oılanýǵa bir aıdaı ýaqyt beriledi. Eger osy merzim aralyǵynda jumysqa turmasa, onda qaryzy bar ákelermen is basqasha júrgizilmek.
Jumyspen qamtý ortalyǵynyń esigi óz balalaryna aqy tólemeı júrgen ákeler úshin aıqara ashyldy. Alımentin tólemeý úshin aılasyn asyryp júrgen boryshkerler de bar arasynda. Aıtatyn syltaýlary - jumystyń joqtyǵy. Al qalanyń prokýrorlary bul máseleni sheshýge bilek sybana kirisipti.
Bilikti maman qaı kezde de suranysqa ıe. Jumys berýshiler boryshkerlerdiń qaryzy baryna qaramastan, olardyń kásibıligin baǵalaýǵa daıyn. Tipti keıbir mekemeler úmitkerlerge dırektor, basshynyń orynbasary sıaqty 200-den astam bos oryndy usynyp jatqanǵa uqsaıdy.
«Qazir jumyspen qamtý ortalyǵynda bizde 2 myńnan astam bos jumys oryndary tirkelgen jumys berýshilerden kelgen. Osy bos jumys oryndarynyń ishinde 600-den astamy joǵary oqý oryndaryn bitirgen talap qoıylǵan. Sonymen qatar 1500-den astamy orta oqý oryndaryn bitirgen talaptar bar. Qalǵandary oqýy boıynsha talaptar qoıylmaǵan», - dedi Jumyspen qamtý jáne áleýmettik baǵdarlamalar basqarmasy basshysynyń orynbasary Gaýhar ÁBÝEVA.
Jumyssyzdar sanyn azaıtý maqsatynda bıznespen aınalysqysy kelgenderge de múmkindikter qarastyrylypty. Máselen óz kásibin asham deýshilerge mıkrokredıtter beriledi. Al usynylǵan jumystarǵa úmitker bir aıdyń kóleminde kirispese, olarǵa qatań shara qoldanylmaq.
«Baǵyt beremiz, eger bul baǵyt boıynsha bir aıdyń kóleminde tirkelmeı, jumys atqarmaı jatqan bolsa, bul jerde de óziniń jaýapkershilikteri bar. Onyń bári túsindiriledi qazir. Sonymen qatar, qazirgi tańda Almaty qalasy boıynsha jaýapkershilikter aıtatyn bolsaq, 176 boryshker ákimshilik jaýapkershilikke tartyldy jáne 5 boyrshkerdiń ústinen qylmystyq is qozǵaldy. Onyń úsheýi boıynsha sot ókimi shyqty. 2-ýi qaralýda», - dedi Almaly aýdany prokýratýrasynyń bólim basshysy Erlan QASYMBAEV.
Qazir alımentti qaıtarý boıynsha 8 myńdaı azamattyń qujaty qaralyp jatyr. Olardyń 20 paıyzy balalarynyń kútimine tólenetin qarjyny eki qolǵa kúrek tappaǵandyqtan ótemeı júrgendikterin aıtyp aqtalatyn kórinedi.
Nazken Baıtiles, Eldar Muqashev, «Almaty» telearnasy
