Kesheden beri oılandyryp, «qalaı bolar eken?», «bilmeım-aý» degen sıaqty pikirler týǵyzyp júrgen máseleniń biri Astanamyzdyń atyn ózgertý bolyp tur. Árkimniń óz bilgeni, óz topshylaýy bar. Degenmen, sol topshylaýlardy ishińe toptaı bermeı syrtqa shyǵaryp, el talqysyna shyǵarǵanyńnyń ózi – bir bastama. Dál osyndaı bastamashyl jastardyń biri Baltabek Nurǵalıev óziniń Facebook paraqshasynda  dál mynadaı sebepterdi usynǵan eken. Sonymen qatar, óz jazbasyna laıyqty jaýap kútetin kórinedi.

«BES SEBEP BAR!

Qurmetti, dostarym!

Astanamyzdyń atyn NURSULTANSALǴAN dep ataý jóninde pikir aıttym. Sizderden de ulaǵatty usynystar kútip edim, nelikten kidirip jatyrsyzdar?

Bul usynysty jasaýyma birneshe baısaldy sebepter bar:

1. Erligi eńseli, eńbegi eren Elbasymyz Nursultan Ábishuly Nazarbaevtyń týǵan jeri Almaty oblysyndaǵy Shamalǵan aýyly ekenin bárimiz bilemiz. Sol aýyldyń atyna sáıkestendirip, oraılastyryp oı túıgenmin. «Sham», «alǵan» degen eki sózdiń birigýinen quralǵan ǵoı aýyl ataýy. Sol sekildi men de «Nursultan» jáne «salǵan» degen eki uǵymdy ulaǵatpen biriktire bildim.
2. «Óleń – sózdiń patshasy, sóz sarasy, Qıynnan qıystyrar er danasy... Tilge jeńil, júrekke jyly tıip, Tep-tegis jumyr kelsin aınalasy!» dep Abaı babamyz aıtqandaı, NURSULTANSALǴAN – keremet kóterińki kóńil kúıde aıtylatyn asyl sóz! Uly sóz! Máńgilik Eldiń maǵynaly muraty! Rasymen, «tilge jeńil, júrekke jyly» sóz! İshińizden izgi nıettenip, qazirgi Astana kelbetine qarap turyp, osy ataýdy birneshe márte qaıtalańyzshy! El perzenti retinde ǵalamat sulý sezim bıleıdi janyńyzdy! Shyn tebirenesiz! Aqynjandy el emes pe edik? Ár azamat aqynjandylyqpen aıtsyn Er Esimin! Sol kezde kóz jetkizesiz bárine! Júrek únin tyńdańyz! Ol aldamaıdy.
3. Bul sózdi estigen ózge elder bizdiń Elbasymyzǵa degen ıgi qurmetimizden ımenetin bolady. «Biz nege qazaq halqy sekildi sanaly, salaýatty emespiz...» dep bizge qarap, boı túzeıdi, oı túzeıdi. Aýyzbirshiligimizden aıaq tartady ǵoı.
4. «Astana atyn ózgertýdiń esh qajeti joq! Astana ataýyn bári biledi. Bul – baıaǵydan qalyptasqan brend» deıtinderge aıtarym – QAJETİ BAR! Sebebi, Astanada ótkizilgen qandaı da bolmasyn berekeli bastamalardyń, shuǵylaly sharalardyń barlyǵynyń bir jebeýshisi, bir qamqorshysy Elbasymyz Nursultan Ábishuly Nazarbaev ekenin dúıim dúnıejúzi jaqsy biledi. Álemdik oımen biz ádep saqtaı otyryp, sanasýymyz kerek. Álem úshin – Elbasymyzdyń Esimi – BÁRİNEN BIİK BREND! Qandaı saıası salmaǵy bar baıandy bastamalardyń barlyǵy Elbasy oıshyldyǵynyń, Elbasy danalyǵynyń dara jemisi. Oı kúshi – Álemdegi eń orasan kúsh! Igilikti ıdeıalardy oılap taýyp, olardy júzege asyrý – eń abyroıly is! Elbasymyz Astana tynysyn keńeıtip, el mereıin ústem qylýda óziniń óte zor oı qajyryn, qıal qaıratyn sarp etti. Túnde uıyqtamady, kúndiz kúlmedi! Osy ozyq oıly Elbasymyzdyń esimin ulyqtap, Uly Daladaǵy Astana ataýyn Nursultan Ábishulynyń abyroıly atymen baılanystyrý – biz úshin baqyt!
5. Bul – Qudaıdyń buıryǵy! Alla-taǵalanyń: «Patshalaryń – meniń jerdegi elshilerim. Qurmettep, qasterleńder! Qadirin bilińder!» dep bizge amanat etkenin aldyńǵy jazbamda aıtqan edim ǵoı! Abaı baba endi birde: «Ánniń de estisi bar, eseri bar!» deıdi. Al, aqyn Nurlan Orazalın Aǵamyz bir jyrynda: «Eser ulǵa esti baqyt qonbaıdy!» dep tolǵanady. Basymyzdaǵy baqytymyzdyń baǵasyn, qadirin bilip, biraýyzdan osy usynysty qabyldaǵanymyz abzal! Ádildik ánin shyrqaýǵa nege jasqanamyz? Táýelsiz el emespiz be? Eserligimizdi emes, estiligimizdi pash etetin sát týdy, halaıyq!»

Qalaı oılaısyzdar?

                                                                                                                                                        Sholýshy Orazhan Aqtolqyn