"Azamattarǵa arnalǵan úkimet" memlekettik korporasıasy zeınetaqyny qaıta eseptedi dep habarlaıdy Qamshy aqparattyq agenttigi korporasıanyń baspasóz qyzmetine silteme jasap.  1 shildeden bastap 2,1 mıllıonnan astam zeınetker ulǵaıtylǵan zeınetaqy alady. Qazaqstandyqtardyń yntymaqty zeınetaqy tólemderi jyl basynda 9 paıyzǵa arttyrylǵanyn eskere otyryp, 11 paıyzǵa kóbeıetin bolady. Bazalyq zeınetaqy jyl basynda 7 paıyzǵa arttyrylǵanyn eskere otyryp, 13 paıyzǵa ósedi. Bul tapsyrysty Memleket basshysy 2017 jylǵy qańtar aıynda Qazaqstan halqyna Joldaýynda berdi. 

Joldaýǵa sáıkes 2017-2018 jyldary zeınetaqy mólsheri kezeń-kezeńmen ósedi. 2016 jylmen salystyrǵanda 2017 jyldyń 1 shildesinen bastap zeınetaqy mólsheri 20 paıyzǵa deıin kóteriledi. Máselen, eń tómengi zeınetaqy mólsheri (bazalyq zeınetaqyny eskere otyryp) 2017 jyldyń 1 qańtarynan bastap 40 950 teńge bolsa, 2017 jyldyń 1 shildesinen bastap 45 711 teńgege deıin kóteriledi. Salystyrma túrde 2016 jyly eń tómengi zeınetaqy mólsheri 37789 teńgeni qurady. Bazalyq zeınetaqy tólemderi bıylǵy jyldyń 1 shildesinen bastap 14 466 teńgeni quraıdy, al  zeınetaqynyń ortasha mólsheri (bazalyq zeınetaqyny eskere otyryp) 66 676 teńgege deıin artady.

Zeınetaqy tólemderi barlyq esepte turǵan zeınetkerlerge qaıta esepteletini aıtylady. Bul rette, qosymsha qujattardy usyný talap etilmeıdi.

Sondaı-aq, ana men balany qoldaý boıynsha memlekettik saıasat sheńberinde 1 shildeden bastap bala týýyna baılanysty birjolǵy járdemaqy mólsheri 20 paıyzǵa ulǵaıady. Birinshi, ekinshi jáne úshinshi balaǵa járdemaqy somasy 38 AEK nemese 86 222 teńgeni, tórtinshi jáne odan keıingi balalarǵa - 63 AEK nemese 142 947 teńgeni quraıdy.

"Sondaı-aq, jumys berýshilerge Qazaqstanda 1 shildeden bastap mindetti áleýmettik medısınalyq saqtandyrý júıesi iske qosylatyny týraly eskertemiz. Azamattarǵa arnalǵan úkimet MÁMS sheńberinde aýdarym jáne jarnalardy qabyldaýǵa aǵymdaǵy shot ashylǵan", - delingen habarlamada. 
 

Sholýshy: Ásem Álmuhanbet