Kúıeýi ony qyz týa bergeni úshin tastap ketken. Al aqyr aıaǵynda bul ózine jaqsy bolǵan joq.

Júrek shymyrlatar bul oqıǵanyń nemen aıaqtalǵanyn bilgińiz kelse, Qamshy.kz aqparat agenttigi  usynǵan Jázıra Begalynyń Feısbýktegi kelesi jazbasyn oqyńyz.

- Berikpen stýdent kezde tanystym. Sońǵy kýrsta otaý qurdyq. Ekeýmizdi otbasylyq ómirdegi qıynshylyqtar erte eseıitti. Páter jaldadyq. Sábıli boldyq. Tuńǵysh qyzymyz dúnıege keldi. Berik perzenthanaǵa kelgen saıyn men jaqsy kóretin gúlderdi qushaqtap keledi. Dárigerler tyıym salsa da, ol terezeden bir qushaq gúldi kórsetip, jymıyp kúlgenime qýanady. Keıin qaladan páter satyp aldyq. Onyń qyzmette joly boldy. Men tórt qyz týdym. Berik qabaq shytyp, renjigenin eshqashan sezdirgen emes. Bálkim, baqyttan basym aınalyp júrip, baıqamaǵan shyǵarmyn.

Keıingi kezderi onyń jumystan kesh kelýi jıiledi. Burynǵydaı emes qyzdary aldynan júgirip shyqsa asa qýanbaıdy. Úı sharýasyna da selsoq. Onyń ózgergenin kórmeý, sezbeý múmkin emes edi. Biz 13 jylda bir-birimizdi sózsiz túsinetin edik. 13 jyldan keıin ol bizdi tastap ketti. Ári baspanamyzdy satyp, óziniń úlesin bólip aldy. Qyzmettes kelinshek ul týyp, tuıaq jalǵastyratyn murager úshin bárinen bas tartqanyn aıtqanda onyń árbir sózi júregimdi tilgilep jatty. Ol qyz týǵanym úshin kiná taqty. Súıiktimniń sózderi súıekten ótti. Mashınasyna múlkin tıep, úıdi satyp, aqshanyń teń jartysyn bólip, qaltasyna salyp, ketip qaldy.

4 balamdy baǵyp-qaǵý úshin kúndiz-túni jumys istedim. Ýaqyt meniń jastyǵymdy urlap jatty. Balalaryma degen mahabbatym qıyndyqtarǵa moıymaıtyndaı kúsh-qýat berdi. Al Berik sol ketkennen bir kelmedi. Ákesin saǵynyp, kenje qyzym talaı tabaldyryqta uıyqtady.

Tek 30 jyldan keıin Berik úıdi taýyp kelipti. Júdegen. Uly túrmede eki ret jazasyn ótep, balasyn arashalaý úshin abaqtyda ózi úsh jyl otyrypty. Bostandyqqa shyqqanda esirtkiniń qulyna aınalǵan uly dúnıe -múlkin satyp jibergen. Áıeli de basqa erkekpen azamattyq nekede turyp jatyrmyn dep, mańaıyna jolatpapty. Baratyn jer tappaǵan bolar. Sodan burynǵy dostarynan surastyryp bizdi tapqan eken. Keshirdim. Bir bólmeni berdim. Onyń úıde júrgeni maǵan da soqqy bolsa da nemerelerimniń atasy, qyzdarymnyń ákesi dep, ishteı tyndym. Bárine kóndim.

Bir shańyraqta tursaq ta ekeýmiz sóılespeıtinbiz. Ol júzime tik qaraǵan emes. Bir aıdan keıin uly esirtkiden ýlanyp, qaıtys boldy. Qansha ýaqyt ótkeni esimde joq.

Birde ol eki-úsh kún úıge qonbady. Keıin bireýler Úlken Almaty ózeniniń jaǵasynan taýyp, polısıaǵa habarlaǵan eken." Máıithanadan alyp ketińizder", - degen habardy estigende eseńgirep qaldym. Saraptama jasaǵandar júrek talmasynan kóz jumǵan dedi. Ol tabyttyń ishinde kishkentaı bolyp ketkendeı kórindi kózime. Qyzdarym, kúıeý balalarym jerledi.

Ol bir kúrsinip, nemere ulyn jetektep, avtobýstan túsip qaldy. Balqıa degen kisiniń áńgimesinen keıin qyz týǵany úshin otbasyn oıran etken ákeler jaıly oqıǵalar oıyma oraldy. Degenmen maǵan áıelin, qyzdaryn murager týylmaǵany úshin tastap ketken erkekterdi túsiný qıyn eken.