Bas prokýratýrada 2017 jyldyń 1-shi jartyjyldyq jumysy qorytyndylanyp, Elbasynyń «100 naqty qadam» Ult jospary men Qazaqstan halqyna jyl saıynǵy Joldaýynda kózdelgen strategıalyq tapsyrmalary talqylandy, dep habarlaıdy Qamshy.kz aqparat agenttigi.

J. Asanov Konstıtýsıanyń prokýratýra týraly 83-babyna 22 jyldyń ishinde alǵash ret ózgerister engizilgenin, jańa Zań qabyldanǵanyn atap ótti. Bulardyń barlyǵy adamdardyń quqyqtary men bostandyqtaryn, qoǵam, bıznes pen memleket múddesin qorǵaýdaǵy jumystardy kúsheıtýge baǵyttalǵan.

Aldaǵy kezeńge tapsyrmalar aıqyndaldy:

1. Konstıtýsıada bekitilgendeı memleket atynan qylmystyq qýdalaýdy júrgizý mindetin sapaly iske asyryp, prosesýaldyq prokýrorlardyń rolin arttyrý arqyly  olardyń nazaryn qylmystyq proseske barynsha aýdarý.
2. E-qylmystyq pen E-ákimshilik is aqparattyq júıeleri men «Zańdylyq» aqparattyq-taldamalyq júıelerdi odan ári engizýdi jalǵastyrý. Bul júıeler ister boıynsha óndiristiń sapasyn arttyrady, qajetsiz qujat aınalymyn azaıtady, is materıaldaryn burmalaýǵa jol bermeıdi, barlyq satyda ýaqyt únemdeıdi, sondaı-aq  isti júrgizý satysy men sotqa jóneltý kezindede prosestik olqylyqty boldyrmaıdy.
3. Azamattardyń ótinishterin qaraý barysynda jańa ádisterdi, onyń ishinde óńirlerde Quqyq qorǵaý qyzmetteri ortalyqtaryn ashýdy júzege asyrý. Azamattardyń ótinishterin qaraý jumysyn jańa ári sapaly deńgeıge kóterý úshin prokýratýra alańynda ortalyqtar ashylyp, onda bir top kásibı mamandar (prokýror, advokat, medıator, notarıýs, psıholog, probasıa qyzmeti men ákimdik ókilderi) tegin kópsalaly quqyqtyq kómek kórsetetin bolady. Bul Ult josparynyń 100-shi qadamynan bastaý alyp,  quqyqtyq qyzmet kórsetýdi bir jerde shoǵyrlandyrýdy kózdeıdi.

Dál osy kúni Bas prokýratýrada Quqyq qorǵaý qyzmetteri ortalyǵynyń ashylýy bolyp ótti (budan ári - Ortalyq).

Ortalyq Bas prokýratýra ǵımaratynda ornalasty. Onyń jalpy aýdany myń sharshy metrge jýyq alańdy qamtyp, zamanaýı ınjenerlik-tehnıkalyq jabdyqtarmen, elektrondyq kezek júıesimen, «Connection Point» óz-ózine qyzmet kórsetý sektorymen, sondaı-aq kútý zaly jáne ózge de qajetti ınfraqurylymmen jabdyqtalǵan. 

Atalǵan Ortalyqta azamattarǵa tájirıbeli prokýrorlar quqyqtyq kómek kórsetedi. Azamattardyń aryz-shaǵymdaryn ýaqytyly ári tıimdi sheshý úshin bul jumysqa ózge de zańgerler tartylady (advokattar, medıatorlar, notarıýstar, probasıa qyzmetkerleri jáne t.b.).

Ortalyqtyń basty maqsaty - azamattarǵa ashyq, jarıaly túrde kómek kórsetip, olardy áýre-sarsańǵa salmaı quqyǵyn jedel túrde qorǵaý.