Qazaqstannan ózge memleketterde turatyn qazaqtar arasynda sportpen shuǵyldanyp, halyqaralyq jarystarda jetistikke jetip júrgen jastar bar. Olardyń keıbiri – Qytaı, Mońǵolıa, Germanıa, Ózbekstannyń ulttyq quramalaryna múshe. QYTAIDAǴY BALÝAN 1990 jyly Qytaıdyń Shyńjań ólkesinde týǵan Erlanbek Káteıuly erkin kúrespen aınalysady. Ol 2011 jyly Qytaı chempıonatyna qatysyp, altyn medal alǵan. İshki chempıonatyndaǵy jeńisinen keıin qazaq jigiti osy eldiń ulttyq quramasyna endi. – Qazir Nanjý qalasynda turyp, sonda jattyǵamyn. Qytaı quramasynyń bazasynda turamyn. 2011 jyly Qytaıdyń ishki chempıonatynda birinshi oryn aldym. Men kúresetin 66 kılogramm salmaqta jetpis balýan jarysqa qatysty. Jalpy, meni kúreske týǵan aǵam Nurlybek Káteı alyp keldi. Keıin Temirbek Serik degen aǵamyz jattyqtyrdy. Ol aǵamyz qazir Shyńjańda bapkerlikpen aınalysady. Al meni Nanjý qalasynda Hýmı esimdi mońǵol bapkeri jattyqtyrady, – dedi Qytaıdaǵy qazaq balýany Erlanbek Káteıuly. Balýan Qazaqstanǵa alǵash ret 2012 jyly sáýir aıynda keldi. Qytaı quramasynyń atynan Qazaqstan prezıdenti týrnırine qatysyp, besinshi oryn alǵan Erlanbek Káteıuly jartylaı fınalda qazaqstandyq balýan Aqjúrek Tańatarovtan jeńilgen edi. Qazir Erlanbek Káteıuly kóktemde ótetin Qytaıdyń kezekti ishki chempıonatyna daıyndalyp jatyr. MOŃǴOLIADAǴY BOKSSHY 1990 jyly Baıan-Ólgeı aımaǵynda týǵan Erbolat Tólek – bokstan Mońǵolıa quramasyna engen qazaq jigiti. Sportshy. 2012 jyly Mońǵolıa chempıonatyn utyp, ulttyq quramaǵa alynǵan. – Bokspen aınalysqanyna tórt jyldaı ýaqyt boldy. Alǵashqy kezde kúrespen aınalystym. Bokstaǵy alǵashqy bapkerim – Qaınar Qaısanaı degen azamat. Al

​​qazir ulttyq quramanyń aǵa bapkeri Ganzorıg Tómórdorjynyń qaramaǵynda jattyǵamyn, – dedi Erbolat Tólek. Ol 2012 jyly sáýirde Astanada ótken halyqaralyq týrnırge qatysyp, altynshy oryn ıelendi. – Maǵan Mońǵolıada bar jaǵdaı jasalǵan. Jattyǵýym – júıeli. Jarystarǵa da jıi shyǵyp turamyn. 2013 jyly ótetin Azıa chempıonatyna daıyndalyp jatyrmyn. Al Qazaqstanǵa oralýdy oılanbappyn, meni shaqyryp jatqan da eshkim joq. Ári men bokstasatyn 91 kılogramm salmaqta Qazaqstannyń óz boksshylary jetkilikti. Eger Qazaqstanǵa óz erkimmen oralsam, sporttaǵy jolym kesilip qalýy múmkin. Al Qazaqstan ulttyq quramaǵa shaqyryp jatsa, nege barmasqa, – dedi ol. Erbolat Tólek Mońǵolıa quramasynda ózinen basqa Erkin Jamantaı jáne Ybyraıym Tileýhan degen eki qazaq jigiti de bar ekenin aıtty. ÓZBEKSTANDAǴY SPORTSHYLAR 26 jastaǵy qazaq jigiti Serik Meıirbekov – eskek esýden Ózbekstan quramasynyń múshesi. Ol – bes dúrkin Ózbekstan chempıony, 2010 jyly Qytaıdyń Gýanchjoý

​​ qalasynda ótken Azıa oıyndarynyń altyn júldegeri. Azıada kezinde ol óziniń komandalasy Gerasım Koshnevpen birge qytaılyq jáne qazaqstandyq sportshylardy jeńip ketken edi. Al Ózbekstannyń sporttyq gımnastıka quramasynda Dáýlet Narmetov esimdi qazaq jigiti bar. Ol 2011 jyly Belarýste ótken halyqaralyq jarysta jeńimpaz atanǵan. 2008 jyldan beri Ózbekstan quramasynyń múshesi. 2009 jáne 2011 jylǵy Azıa chempıonatyna, 2010 jylǵy Azıa oıyndaryna qatysqan. GERMANIADAǴY HOKEISHİ 1986 jyly Berlın qalasynda dúnıege kelgen Danıar Júnisov Germanıanyń «Grızlı Adams Volfsbýrg» hokeı komandasynda oınaıdy. Danıar Júnisovti jaqsy tanıtynyn aıtqan jýrnalıs Amangeldi Seıithanovtyń sózinshe, sportshynyń ákesi Aıǵalı Júnisov Almaty qalasynda týǵan. Keıin Qazaqstandaǵy shet tilder ınstıtýtynyń birinde nemis tilin meńgerip, 19 jasynda

​​ oqýyn jalǵastyrý úshin arnaıy joldamamen Berlınge attanady. Oqýyn bitirgen soń Aıǵalı Júnisov Germanıada otbasyn quryp, sol elde turaqtap qalady. Al uly Danıar Júnisov kishkentaıynan hokeı úıirmesine qatysyp, 20 jasynda «Grızlı Adams Volfsbýrg» komandasynyń quramyna alynady. Qazir hokeıshi – osy komandanyń qaqpashysy. – Danıar Júnisov Volfsbýrg qalasynda turady. Boıy 190 metr, salmaǵy 90 kılogramnan asatyn qazaq jigiti – jergilikti komandanyń negizgi qaqpashysy. Germanıa kýbogynyń ıegeri jáne nemis chempıonatynyń kúmis júldegeri Danıar Júnisov «2013 jyly Qazaqstanǵa kelsem» deıdi. Aldaǵy ýaqytta Germanıadaǵy qazaq qaqpashysy qazaqstandyq klýbtardyń birinde oınaýy múmkin, – dep boljaıdy jýrnalıs Amangeldi Seıithanov. FINLÁNDIADAǴY FÝTBOLSHY 25 jastaǵy qazaq fýtbolshysy, Túrkıada týǵan Murat Ónal Fınlándıanyń «AC Kajaani» komandasynda oınaıdy. Fýtbolmen alty jasynan beri aınalysqanyn aıtqan Murat Ónal. Amsterdamdaǵy «Vespýchchı» fýtbol komandasynyń mektebin bitirgen. Sportshy osy eldiń jastar quramasynda, «Amsterdam», «Brúgge», «Den Haag», «Volendam» komandalarynda oınaǵan. – 2008 jyly Qazaqstan quramasyn golandıalyq bapker Arno Paıpers jattyqtyrǵan belgili. Sol kezde ol meni Qazaqstan komandasyna oınaýǵa shaqyrdy. Qazaqstan quramasynyń Golandıadaǵy oqý-jattyǵý jıynyna da qatystym. Biraq sol kezde oqýyma baılanysty eshqaıda bara almadym, – dedi fýtbolshy qazaqstandyq basylymdarǵa bergen suqbatynda. Murat Ónal 2011 jyly Qaraǵandynyń «Shahter» komandasyna shaqyrylǵanyn, «biraq azamattyq alý máselesi uzaqqa sozylyp ketkendikten Qaraǵandyǵa kele almaǵanyn» aıtady. – Meni Qazaqstan azamaty emespin. Al qaraǵandylyq komanda meni legıoner retinde komanda quramyna qosa almady. Legıonerler alý úshin bólingen kvotaǵa basqa sheteldik fýtbolshylardy shaqyryp qoıypty. Komanda basshylyǵy «eger Qazaqstan azamattyǵyn alsań, komandaǵa alamyz» dedi. Biraq men tez arada azamattyq ala almadym, – deıdi Murat Ónal. Murat Ónal oınaıtyn fıniń «AC Kajaani» komandasy ishki chempıonattyń ekinshi lıgasynda jeńiske jetip, birinshi lıgaǵa ótti. Al qazaq jigiti komanda quramynda 12 oıyn ótkizip, jeti gol saldy.

Rýslan Medelbek

maqala azattyq.org saıtynan alyndy