2017 jyly «Nurly jol» baǵdarlamasyn júzege asyrý úshin 484,2 mlrd. teńge qarastyrylǵan. Bul týraly Úkimet otyrysynda Ulttyq ekonomıka mınıstri Tımýr Súleımenov aıtty, dep habarlaıdy Qamshy.kz aqparat agenttigi.
«Memlekettik baǵdarlamany júzege asyrý úshin 2017 jyly 484,2 mlrd. teńge qarastyrylǵan. Onyń ishinde 2017 jylǵy 1 shildege deıin 126,5 mlrd. teńge ıgerildi. 2017 jyly Ulttyq qor qarjysynan 109 bilim berý nysanynyń qurylysyna 71,7 mlrd. teńge qarastyrylǵan. Onyń 53-i aýyspaly nysan, 56-y jańa nysan», - dedi «Nurly jol» memlekettik baǵdarlamasynyń 2017 jylǵy 1-shi jarty jyldyqtaǵy qorytyndysy týraly baıandaǵan Súleımenov.
Mınıstrdiń aıtýynsha, bıylǵy jylǵy 1 shildedegi jaǵdaı boıynsha, jergilikti búdjetke 30,4 mlrd. teńge aýdaryldy jáne tolyq kólemde ıgerildi. Jambyl, Qaraǵandy jáne Ońtústik Qazaqstan oblystarynda 1150 oryndyq 3 mektep jáne Mańǵystaý men Shyǵys Qazaqstan oblystarynda 2 balabaqsha iske qosyldy.
«Respýblıkalyq mańyzy bar 22 negizgi avtojol jobalaryn júzege asyrý úshin 2017 jyly respýblıkalyq búdjetten jáne Ulttyq qor qarjysynan 259,8 mıllıard teńge qarastyrylyp, onyń ishinde 2017 jyldyń 1 shildesine deıin 51,5 mlrd. teńge ıgerildi. Sonymen qatar, qosymsha halyqaralyq qarjy uıymdarynan 96,4 mlrd teńge tartylyp, búginge deıin onyń 13,2 mlrd. teńgesi ıgerip otyr. Jalpy alǵanda, aǵymdaǵy jyly qurylys jáne qaıta jańǵyrtý arqyly 4,4 myń km joldy qamtyp, 602 km paıdalanýǵa berý josparlanyp otyr.
Sondaı-aq, logıstıkalyq ınfraqurylymdy damytý úshin 2017 jyly ulttyq qor qarjysy esebinen jáne respýblıkalyq búdjetten 55 mlrd. teńge qarastyrylyp, onyń ishinde 15 mlrd. teńge ıgerildi. Osy qarajat Quryq portynyń ekinshi kezeńi men Astana áýejaıynyń qurylysyna jumsalady. Atap aıtqanda, Quryq portyndaǵy paromdyq keshenniń ekinshi kezeńin iske asyrý úshin 50 mlrd. teńge qarastyrylǵan, onyń ishinde aǵymdaǵy jyldyń 1 shildesinde «Qazaqstan temir joly» 15 mlrd. teńge ıgerdi», - dedi mınıstr.
Mınıstrdiń aıtýynsha, qurylys-montajdaý jumystary kestege sáıkes júrgizilýde. Al Astananyń halyqaralyq áýejaıyndaǵy jolaýshylar termınaly, osy jyldyń 31 mamyrynda paıdalanýǵa berilgen.
«Osy nysannyń qosymsha ınfraqurylymy úshin 2017 jyly ulttyq qor qarjysy esebinen 5 mlrd. teńge bólindi. Jospar boıynsha qarjy aǵymdaǵy jyldyń jeltoqsan aıyna deıin ıgerilýi qajet», - dedi Súleımenov.
