İshki ister mınıstri Qalmuhanbet Qasymov úkimet otyrysynda «Esirtki quraldary, psıhotroptyq zattar, sol tektester jáne prekýrsorlar aınalymyn baqylaý máseleleri boıynsha QR-nyń keıbir zańnamalyq aktilerine ózgerister men tolyqtyrýlar engizý týraly» Zań jobasyn tanystyrdy dep habarlaıdy Qamshy.kz aqparat agenttigi Qazaqstan Respýblıkasy İshki ister mınıstrligi baspasóz qyzmetine silteme jasaı otyryp.
Q.Qasymov óz sózinde Qazaqstan da ózge elder sıaqty sıntetıkadan jasalǵan jańa psıhobelsendi zattardyń taralý qaýpimen betpe-bet kelip otyrǵanyn atap ótti. Bul zattardyń naryǵy olardyń jańa túrlerimen tez tolyǵýda. Sondyqtan oǵan ýaqytyly shara qoldaný, sonyń ishinde elde onyń barlyq túrine tyıym salý, zańsyz aınalymnan alynǵan «qylmystyq salmaqtyń» mólsherin bekitý qajettigi týyndaıdy.
–Alaıda, mundaı tyıym salý mehanızmin engizý – aıtarlyqtaı uzaq proses. Tyıym salynǵan esirtki quraldary men psıhotroptyq zattardyń Ulttyq Tizimi zańmen bekitiledi, oǵan túzetýler engizý biraz ýaqytty qajet etedi. Bul jańa psıhobelsendi zattardyń taralý qaýpin kúsheıtedi, – dedi mınıstr.
Halyqaralyq tájirıbeni zerttep, elimizdiń Konstıtýsıalyq keńes qorytyndysyn alǵannan keıin, Úkimettiń qaýlysymen tyıym salynǵan esirtki quraldarynyń Ulttyq Tizimin bekitý qajettigi týraly sheshimge keldi, bul óz kezeginde naryqta paıda bolǵan psıhobelsendi zattardyń jańa túrlerimen jedel kúres júrgizýge múmkindik beredi.
İshki ister mınıstri Qylmystyq kodeks pen «Esirtki quraldary týraly» Zań jobalaryna engiziletin kelesideı túzetýlerdi atap ótti:
• Ulttyq Tizimdi bekitý boıynsha Úkimettiń tikeleı quzyretin aıqyndaý. Esirtki quraldary tizimi men olardy shaǵyn, iri jáne asa iri mólsherlerge jatqyzý jónindegi Qurama kesteni Úkimet bekitedi.
• Esirtkiniń Ulttyq tizimi men Qurama kestesi aıtarlyqtaı qaýipti 88 psıhobelsendi zattarmen tolyqtyrylady. Bul Eýrazıalyq ekonomıkalyq odaǵy elderi jáne BUU esirtkini qadaǵalaý jónindegi halyqaralyq komıtetiniń baqylaýyndaǵy barlyq sıntetıkalyq esirtkiler tizimin qamtýǵa múmkindik beredi.
• Esirtkiniń balamasy jáne sýtek atomdaryn almastyrýshy sıaqty jańa túsinikter de tizimge kirgiziledi. Bul psıhobelsendi zattardy esirtkiniń balamasyna engizýdiń naqty mehanızmin bekitip, balamalarǵa klınıkalyq zertteýler júrgizý qajettigin joıady.
• «Esirtki quraldary týraly…» Zań esirtkiniń, sonyń ishinde onyń jańa túrlerin baqylaýǵa qoıýdyń negizi men tártibin aıqyndaıtyn naqty normalarmen tolyqtyrylady.
• Ákimshilik nemese qylmystyq jaýapkershilikke tartý úshin tyıym salynǵan zattan «krımınaldyq salmaq» nemese «baǵalaý mólsherin» bekitý qajet. Qoldanystaǵy Qurama kestede esirtkiniń 275 túri bar, sonyń 86-sy baǵalaý mólsherimen shektelgen. Zań jobasy atalǵan 275 túri men engiziletin jańa 88 psıhobelsendi zattardyń negizgi túri kórsetkishterin bekitýdi qarastyrady.
