QR Bilim jáne ǵylym mınıstri Erlan Saǵadıev  "100 naqty qadam" ult josparyn iske asyrýǵa arnalǵan baspasóz konferensıasynda eń ózekti suraqtarǵa jaýap berdi. Onyń ishinde memlekettik granttardyń kóbeıýýi jáne latyn álipbıine kóshý máselesi bar dep habarlaıdy Qamshy.kz  aqparat agenttigi.

QR Bilim jáne ǵylym mınıstriniń sózinshe, osy jyly grant bakalavrıatqa  6 myńǵa, al magıstratýraǵa 3 myńǵa artty.

 «Bakalavrıatqa grant 31 myńnan 37-ge kóbeıdi jáne magıstratýraǵa grant 7 myńnan 10 myńǵa kóterildi. Sonymen qatar, PhD-ge grant eki esege artty. Biz granttardyń barlyq mamandyq pen sala boıynsha birdeı bólinýin qadaǵaladyq. Pedagogıkalyq mamandyqtarǵa basymdylyq berdik. Oǵan basqalarymen salystyrǵanda grant 20% artyq bólindi. Jalpy granttar birdeı taǵaıyndaldy» dedi Saǵadıev.

 Latyn álipbıine kóshý týraly da  mınıstr óz pikirin bildirdi.

«Latyn álipbıine kóshý máselesine keletin bolsaq, bul mańyzdy joba. Munda qatelespeı, barynsha muqıat bolǵan jón. Bıyl barshamyzǵa tıimdi álipbıdi qabyldaý kerek. Birneshe nusqasyn daıyndaý, olardy talqylap, tıimdisin qabyldaý jáne odan ári latyn álipbıine kóshý boıynsha jumys josparyn ázirleý qajet», - dedi ol.

Mınıstrdiń aıtýynsha, qazir arnaıy komısıa qurylyp, osy másele boıynsha jumys istep jatyr. 

Eske sala keteıik, buryn Elbasy Nursultan Nazarbaev óziniń "Bolashaqqa baǵdar: rýhanı jańǵyrý" atty baǵdarlamalyq maqalasynda 2017 jyldyń sońyna deıin latyn álipbıiniń jobasyn ázirleýdi tapsyrǵan bolatyn.