Super.kg saıtynyń jýrnalısi Avtandıl Dobýlbekov Qyrǵyzstan prezıdenti Almazbek Atambaevqa qoıǵan suraǵynan keıin jumystan qýylǵanyn málimdedi, dep jazady Qamshy.kz aqparat agenttigi. Atambaevtyń jýrnalısermen kezdesýi 24 shildede Sholpan Atada ótken.
«Prezıdenttiń baspasóz konferensıasynan keıin jumysqa kelsem, redaksıa maǵan tosyn syı daıyndap qoıypty. Kórisermiz!», - dep jazdy jýrnalıs óziniń Feısbýktegi paraqshasyna. Saıt basshylyǵy qandaı da bir pikir berýden bas tartty.
24 shildede ótken Atambaevtyń baspasóz konferensıasynda Dobýlbekov prezıdentten "qyrǵyz halqyn nege jıi synaısyz?" degen suraq qoıǵan. Atambaev onyń saýaly ósek-aıanǵa qurylǵanyn aıtyp, jýrnalıske «kásibı bolýyn» eskertken.
Super.kg saıty men "Sýper ınfo" gazetiniń ıesi - Qyrǵyzstannyń Malaızıadaǵy burynǵy elshisi - Qylyshbek Sultanov. Ol qyzmetinen 2016 jyly tamyzda ketken, sebebi Qyrǵyzstan konstıtýsıasynyń ózgerýine qarsy shyqqan. Keıin elshi Facebook jelisinde Atambaevtan keshirim suraǵan.
