Astana ýaqyty boıynsha, saǵat 20:21-de esepke alý júıesi EKSPO-2017 kórmesiniń eki mıllıonynshy kelýshisin tirkedi. Ol 34 jastaǵy Oraldyq kásipker - Ǵaısa Jumalıev. London bıznes mektebiniń túlegi atap ótkendeı, ol bıznes salasynda eńbek etip júrgenine bıyl bes jyldyń júzi bolypty. Bul onyń Kórmege birinshi kelýi emes. Kórme kelýshisi Astanaǵa jumys saparymen at basyn burypty. Búgin ol «EKSPO-2017» kórmesi aıasynda ótip jatqan  Batys Qazaqstan oblysynyń mádenıet kúnderine oraı jerlesterin qoldaýǵa kelgen. Ǵaısanyń aıtýynsha, bul oqıǵa ol úshin kútpegen jaǵdaı boldy, ásirese ony úıde kútip otyrǵan otbasyna ásirese, áıeli jáne egiz uldary tańqalady, dep habarlaıdy Qamshy.kz aqparat agenttigi EKSPO-2017 medıaortalyǵyna silteme jasaı otyryp.

 «Jekemenshik sektordyń ókili jáne Qazaqstannyń azamaty retinde, Qazaqstanda osyndaı joǵary deńgeıde kórmeniń ótkizilip jatqany, meni árıne, qýantady. Men birneshe jyl shetelde turdym, onyń eki jylynda oqydym, tórt jyl jumys istedim. Júzden asa memleket óz pavılondaryn kórsetkeni  men úshin qýantarlyq jaıttardyń biri boldy.  Biz kópke tanyldyq, sonymen qatar, jetekshi memleketterdiń jańa ınovasıalyq tehnologıalaryn ózimizge qabyldaı alamyz. Qazirgi ýaqytta, kórip turǵanymyzdaı,kóptegen týrıser bizde qonaqta jáne búkil álem bizdiń elimizdi jaqsy qyrynan kórýge múmkindik aldy. Qazaqstanǵa  «EKSPO -2017» kórmesin ótkizýge múmkindik týǵanyna meniń týǵan jerime degen maqtanysh sezimin oıatty»,-dep atap ótti eki mıllıonynshy kelýshi.

Sonymen qatar, «Astana EKSPO-2017» UK» AQ Basqarma Tóraǵasy  Ahmetjan Esimov kórme kelýshisin quttyqtap, oǵan estelik syılyqtardy tartý etti. Ulttyq kompanıa Basshysy óz sózinde atap ótkendeı, jospardaǵy meje ýaqytynan bir aı buryn oryndaldy.

 «Ǵaısa bizdi baqytty etti dep aıta alamyn. Kórme, bárińiz biletindeı, bul Elbasymyzdyń salıqaly saıasatynan týǵan úlken joba. EKSPO-2017 kórmesiniń  árbir qatysýshy óz eliniń tek jaqsy qyrlaryn kórsetýge tyrysady.  Biz kórme sońyna deıin 30 kún qalǵanda josparly kórsetkish – eki mıllıon kelýshige qol jetkizdik. EKSPO-2017 kórmesiniń halyqaralyq pavılondar men nysandarynyń kelýshi sanyna toqtalatyn bolsaq, olardyń kórsetkishi 15 mln-nan asyp ketti», - dep atap ótti Ahmetjan Esimov.

Sondaı-aq, ulttyq kompanıa Basshysy atap ótkendeı, «EKSPO-2017» arqasynda, Astanamyzdyń  ekonomıkalyq jaǵdaıy jaqsara túsip, aıtarlyqtaı ósim kórdi. Sonymen qatar, Astana turǵyn-úı jalǵa berý 33% -ǵa, qonaqúılerdiń suranysy 28% - dan 60% - ǵa deıin ósti. Týrızm salasynyń damýyna kelsek, kórmeniń ótý barysynda týroperatorlarǵa júginý 78%-ǵa deıin jetti. Kún saıyn Astanaǵa tikushaqpen ushatyn adamdar sany 7 myń jáne 16 myń adam temir jolmen  keledi. Bul rette taýar aınalymy Astanada 20% - ǵa ósti, al qyzmet kórsetý salasyna suranys 2,5% - ǵa deıin kóterildi.

Aıta keteıik, 11 shilde kúni Halyqaralyq mamandandyrylǵan EKSPO-2017 kórmesi mıllıonynshy kelýshini qarsy alǵan bolatyn. Bul qýanyshqa Astana qalasynyń 27 jastaǵy turǵyny ıe boldy.