Astana qalasyndaǵy «Astana Arena» stadıonynda ótken «EXPO-2017 Football Cup» týrnırinde Reseı quramasy jeńiske jetti, dep habarlaıdy Qamshy.kz aqparat agenttigi QazAqparatqa silteme jasap.

Reseı jáne Álem quramasy arasyndaǵy kezdesý «Astana Arena» stadıonyn dúbirge toltyryp jiberdi. Alǵashqy goldy ótkizip alǵanymen Roman Shırokov dýblimen reseılikter alǵa shyqty. Vensant Kandelányń da ekinshi golymen eki komanda ekeýara qos fýtbolshynyń dýblimen almasqan.

Evgenıı Aldonınniń 12 mınýttaǵy ádemi goly basymdyqty taǵy kórshilerge berdi. Úzdikterdiń arasynda esep aıyrymy birinshi taımda uzaı qoıǵan joq. Alǵashqy taım 3:2 esebimen aıaqtaldy.

Týrnırdegi bul saıysty «dúblder machy» dep aıtýǵa bolady. Ekinshi taım reseılik Evgenıı Aldonınniń ekinshi soqqan golymen bastaldy. Artynsha Dmıtrıı Sennıkovtyń goly esep aıyrymyn 3-ke deıin jetkizdi. Ózara gol almasqanymen, basymdyq kórshiles elde qaldy. Kezdesý Reseı quramasynyń paıdasyna 7:4 esebimen sheshildi.

Reseılikterden Dmıtrıı Selnıkov, Vıktor Býlatov, Azamat Abdýraımov kózge tússe, sońǵy goldy Álem quramasynan Iarı Lıtmanen saldy.

Aıta keterligi, Reseıde 2009 jyldan beri álemdik fýtbol juldyzdarynyń 9 týrnıri ótken. Eń qyzyǵy, toǵyz machta da Reseı quramasy chempıon atanǵan.

Eske sala ketsek, «EKSPO-2017» halyqaralyq kórmesiniń aıasynda ótkizilgen «EXPO-2017 Football Cup» 5 tamyzda bastalǵan bolatyn. Alty komanda, atap aıtqanda Qazaqstan, Reseı, Italıa, Germanıa, Portýgalıa jáne Álem quramalary atalǵan týrnırde ózara baq synasty. Qazaqstan quramasy Italıa men Germanıa quramalary artqa tastap, tórtinshi orynǵa ıe boldy. Úshinshi oryn portýgalıalyqtarǵa buıyrsa, ekinshi oryndy Álem quramasy ıelendi.

Týrnırdiń jeńimpaz komandalaryn QR Mádenıet jáne sport mınıstri Arystanbek Muhamedıuly, «EKSPO-2017» ulttyq kompanıasynyń basqarma tóraǵasy Ahmetjan Esimov jáne Astana qalasynyń ákimi Áset Isekeshev marapattady.