Aqmola oblysynda kólde eki qyz sýǵa batyp ketti, – dep habarlaıdy Qamshy.kz aqparat agenttigi Tengrinews.kz saıtyna silteme jasap.  

Kýáger Ulan Ábishevtiń aıtýynsha, qaıǵyly oqıǵa 6 tamyzda kúndizgi ýaqytta saǵat shamamen 13.45-te Býrabaı kýrortynyń Aqylbaı eldi mekeni jaǵyndaǵy Maloe Chebache kólinde bolǵan. 

"Otbasymyzben qaıǵyǵa dýshar boldyq. Búgin Maloe Chebache kólinde demalǵanbyz. Birneshe saǵat shomylǵannan keıin jınala bastadyq, sosyn men estelik bolsyn dep sýretke túsirdim. Keıin sýretterdiń birinde qaıǵyly oqıǵanyń beınelengenin anyqtadyq. Sol kezde eki qyz ben bir jasóspirim ómiri úshin arpalysyp jatypty. Olardyń úrmeli matrasy jelden aýdarylyp ketken eken. Olardy qutqarýǵa birneshe jigit júzip barǵan, alaıda tek balany qutqarýǵa álderi kelipti. Amal ne, qyzdardy qutqara almapty. Olar jaǵalaýda júgirip, qutqarýshylardy shaqyrýdy suraǵan, al qutqarýshylar bir saǵattan keıin keldi. Osy bir saǵat boıy qyzdarǵa qarap, sharasyz turdyq. Áıelder men balalar jylady. Kólde kezekshiler bolmady, qaıyq ta, qutqarý jıletteri de bolmady", – dep jazdy ol. 

Qaıǵyly oqıǵa týraly málimetti QR İİM TJK resmı ókili Rýslan Imanqulov rastady. 

"17.09 - da Býrabaı aýdanynda, Maloe Chebache kólinde jedel qutqarý jasaǵy 1999 jylǵy qyzdyń denesin alyp shyqty, ol shomylýǵa arnaıy jasaqtalmaǵan jerde shomylǵan. Sol jaqta sýǵa batyp ketken 1996 jylǵy taǵy bir qyzdy izdestirý sharalary júrip jatyr", – dep habarlady Imanqulov. 

Al Qazaqstan boıynsha 6 tamyzda shomylýǵa arnaıy jasaqtalmaǵan jerde sýǵa túsken 11 adam qaza bolǵan, taǵy bireýin izdestirý jumystary júrgizilip jatyr. TJK málimetinshe, sýǵa batyp ketkenderdiń ekeýi – balalar.