Batys Qazaqstan oblysynda 45 memlekettik medısınalyq uıym bar. Onyń 28-i dárihanalyq uıym, sonyń ishinde tórt dıspanser, 12 ortalyq aýdandyq, úsh aýdandyq aýrýhana, bir «Aýdanaralyq saýyqtyrý aýrýhanasy» ońaltý ortalyǵy jáne segiz aýrýhana bar. Sondaı-aq alty derbes ambýlatorlyq-emhanalyq, 11 basqa da medısınalyq uıym bolsa,  ortalyq aýdandyq jáne aýdandyq aýrýhanalar quramyna kiretin bir aýyldyq aýrýhana jáne 60 dárigerlik ambýlatorıa, 61 feldsherlik-akýsherlik jáne 221 medısınalyq pýnkt jumys jasaıdy. Al densaýlyq saqtaý salasynyń damýyn bilikti mamandar men álemdik tájirıbesiz  elestetý múmkin emes.  Sondyqtan oblystyń medısına uıymdarynyń dárigerleri josparǵa sáıkes elimizdegi joǵary medısınalyq oqý oryndarynda biliktilikterin arttyrýda, sonymen qatar, qajettilikke oraı jaqyn jáne alys shetelderde tájirıbe almasýǵa jaǵdaı jasalǵan. Aıta ketsek, jýyrda oblystyq densaýlyq saqtaý salasynyń  jumysyn damytý, tájirıbe almasý  maqsatynda  óńirge   12 túrli salasynyń bilikti dárigerleri kelip, sheberlik synybyn ótkizdi. Olardyń qatarynda Atyraý klınıkasynyń dárigeri R. Medeýbaev, M.  Ospanov atyndaǵy №1 BQMMÝ-dyń akýsherlik jáne gınekologıa kafedrasynyń jetekshisi S.Ryjkova, dermatovenerolog R. Álıev, J.Dosymov, Ulttyq ǵylymı kardıohırýrgıalyqlyq ortalyq dárigerleri A.Medresova men T.Nurmuhambetov jáne elimizdegi bilikti psıhıatrlary men psıholog mamandary bar. Sondaı-aq Germanıadan tájirıbeli dáriger H.Hoıman  kelip,  qulaǵynyń múkisi bar naýqastarǵa 13 ota jasady.

-«Dárigerler desantyn» bizdiń óńirge birinshi ret osylaı top bolyp kelip, turǵyndarǵa qyzmet kórsetti. Naýqastarǵa ota jasap, emdeý boıynsha tıimdi keńester berdi. Dárigerlerdiń top bolyp kelip, óńirimizde sheberlik synybyn ótkizýi bizdiń jergilikti dárigerlerge jáne naýqastarǵa úlken kómek dep esepteımin. Óıtkeni dárigerlerdiń biliktiligin kóterý úshin on shaqty dárigerge qarajat bólip, issaparǵa jibergennen góri «Dárigerler desantyn» ózimizde qabyldaǵan áldeqaıda tıimdi. Bir jaǵynan, salany damytýǵa arnalǵan qarajatty únemdeımiz, ekinshi jaǵynan, dárigerlerimiz óz ornynda otyryp, halyqqa paıdaly is jasaıdy. Úshinshiden, syrttan kelgen bilikti dárigerlerdiń tájirıbesin onyń osyndaǵy sheberlik synybyna qatysqan jergilikti dárigerlerdiń barlyǵy kórip, úırenedi. Sondyqtan ıgilikti is jasap júrgen mundaı «Dárigerler desantyn» budan keıin de qabyldaýǵa árqashan daıynbyz,- dedi oblystyq densaýlyq saqtaý basqarmasynyń basshysy Qanat Tósekbaev.

Gúlim AQAP,

Batys Qazaqstan oblysy