Saıt pen áleýmettik jelilerdi qarap otyrsam, tek Almaty men Almaty oblysynda turatyn adamdar búgingi jer silkinisinen keıingi úreı qushaǵyna oranǵan sezimderimen bólisip jatyr. Bireý «bismillásin» aıtyp, «Qudaı saqtasyn» dep jatyr. Ekinshisi, «ómirimde birinshi ret osyndaı qorqynyshty sátti bastan keship otyrmyn» depti. Biraq dál osy ýaqytta Astanada bolǵan jer silkinisi týraly aqparatty kózim shalmady.

Tańǵy 5-ten óte tań namazyn ótep, qaıtadan jata bergenimiz sol edi, aspasham syqyrlap, Tilendıev kóshesindegi №36-ynshy 14 qabatty úı kádimgideı teńseldi, terbeldi. Aspashamǵa qarap, 2-3 bal bar-aý dep shamaladyq. Beınekameraǵa túsirý bylaı tursyn, syqyrlaǵan shamǵa qaraýdyń ózi qorqynyshty. Til kálıma-sháhadat aıtýdan (oǵan da shúkir) tynbady: «Áshhádý ánlá ılahá ıllalla ýá áshhádý ánná Muhammádán abdýhý ýá rasýlýhý (Alladan basqa ǵıbadat etýge laıyqty Jaratýshynyń joqtyǵyna jáne Muhammed Onyń sońǵy paıǵambary ekendigine sháhádat (kýálik) etemin).

Bir kezde toqtaǵandaı boldy, birer sekýndtan keıin aspasham taǵy syqyrlap, boıy soraıǵan sary úı teńselip qoıa berdi. Oı degen júırik emes pe, shirkin?! «Balalardy dalaǵa alyp shyǵaıyn ba? Biraq lezde 12-inshi qabattan birden qaıda shyǵyp úlgerem?... Úlken baǵannyń astyna tyǵylaıyq pa? Odan aman qalýymyzǵa kim kepil? Allanyń ózi jarylqasyn! Namaz oqyldy, dáret bar... Qudaıdan úmit bar», – degen oılardan keıin sharasyz jaǵdaıymyzdy Jaratýshynyń ózine tapsyrdyq.

Táýbemizge keltirgen tańǵy jer silkinisi uıqymyzdy qashyryp, biraz oılandyryp tastady:

– Allanyń synaǵynan keıin eń áýeli Onyń ózinen ǵana pana suraýdy umytyp ketedi ekenbiz. Ózińshe qutylýdyń jolyn «qarastyrasyń...» Biraq qolyńnan túk kelmeıtinin amalsyz moıyndaısyń;

– Bolmashy qas qaǵym sátte osy kúnge deıin jiberip alǵan kemshilikteriń men qatelikteriń, odan qaldy kúnálaryń kóz aldyńnan alma-kezek ótedi eken. Sony qatty ýaıymdap ketesiń;

– Qoǵamda kúnáli ister kóbeıse, Allanyń biz ólshep, boljap bile bermeıtin úlkendi-kishi azaby jetetinin túsinesiń. Kezinde qıyn kúıge dýshar bolǵan qaýymdardy eriksiz eske túsirip, olardan ǵıbrat alasyń;

– Kóp jaǵdaıda tań qylaý bergen sátte jer dúmpýleri tirkeledi. Bul ýaqytta qanshama pende shyrt uıqyda jatady. Quldyń osy bir óte álsiz, beıshara háldegi kórinisin elestetip kórińiz. Tań namazyn jiberip alǵan kezderdi eske alǵanda odan saıyn ókinesiń;

– Jer silkinisi aqtyq saparǵa qanshalyqty daıyn ekendigińdi aldyn ala synap kóretindeı. Mundaıda bala-shaǵa, aǵaıyn-týys, mal-múlik, jumys bárin syryp qoıyp, ımanı hálińmen jalǵyz qalasyń... Oılanatyn oqıǵa...

Aǵabek QONARBAIULY,

Qazaqstan musylmandary dinı basqarmasy

Baspasóz bóliminiń meńgerýshisi