«Qazaqstan» Ulttyq arnasynda qoǵamdyq máselelerdi talqylap, túıinin izdeıtin baǵdarlamalardyń biri «Aıtýǵa ońaı» aıaqtaldy dep habarlaıdy Qamshy.kz aqparat agenttigi. Tamyzdyń sońyna deıin qaıtalaýlar beriledi. Bul týraly baǵdarlama júrgizýshisi, jýrnalıs Beısen Quranbek óziniń Feısbýktegi paraqshasynda málimdedi.

«Bes jyldyń ishinde qoǵamdaǵy qordalanǵan problemalar, qıýy ketip turǵan áleýmettik-turmystyq máseleler, talaıly taǵdyrlar týraly aıtýdaı-aq aıttyq. Jáı ǵana aıtyp qoımaı, qoldan kelgenshe súringenge – súıeý, jyǵylǵanǵa – jastyq boldyq.

Osylaı jalǵastyra bersek te bolatyn edi. Qalyptasqan eldiń kóńilinen oryn tapqan brend, formatty ary qaraı da qoldana berýge bolatyn edi. Biraq ár nárseniń ýaqyty bar, ár nárseniń ólshemi bar. Odan keıin qaıtalaý, usaqtalý, keri ketý bastalatyny belgili.

Jeke ózim úshin de bul sheshim ońaıǵa túsken joq. Qudaı ómir berse, saǵynyshpen esken alatyn bir kezeń artta qalyp barady. Men úshin «Aıtýǵa ońaı» – úırený, ósý, qyzmet etý mektebi boldy. Kóp nárse jazǵym keledi. Ol endi maqtandaı qabyldanýy múmkin ekenin eskerip, qoıa-qoıǵan jón bolar», – dep jazdy jýrnalıs.

Sondaı-aq, osy jobany ómirge ákelgen, ujymǵa senim bildirgen azamattar men azamatshalarǵa, «Qazaqstan» teleradıokorparasıasynyń basshylyǵyna alǵysyn bildirip, «Ulttyq arnanyń» jańǵyrý kezeńine áli de úlesin qosatynyn aıtty.