Elimizde bala dúnıege kelgennen bastap, 16 jasqa deıin 10 túrli aýrýǵa qarsy 20-dan astam ekpe alady. Árıne bul ekpelerdiń kóbisi erikti, alaıda birqatary mindetti bolyp keledi.

 Vaksınalyq ekpe egýge baılanysty qazirgi qoǵamda túrli pikirler aıtylýda. Jalpy Vaksına – belgili bir ınfeksıany joıýǵa baǵyttalǵan mıkroaǵzalardan jasalatyn preparat. Elimizdegi óndiriste vaksınany jasaǵan kezde qatań baqylaýǵa alyp, zıandy ınfeksıalardan qorǵaıtyn qasıetin saqtap, artyq jáne zıandy dárilerden tolyqtaı tazartylady. Odan keıin preparattyń qaýipsizdigi zerthanalyq jáne klınıkalyq tekserýlerden ótedi. Negizinde, vaksına vırýsty aýrýlardyń aldyn alady. Oblystyq densaýlyq saqtaý mamandarynyń aıtýynsha, ekpe aýrýdy múldem boldyrmaıdy degen qate túsinik eken. Vaksına – aýrýdyń jeńil ótýin ǵana qamtamasyz etedi jáne keseldi asqyndyrmaıdy. Sondaı-aq oblysta ekpege qarsy otbasylar sany da kóbeıgen. Oblystyq densaýlyq saqtaý basqarma basshysynyń orynbasary Nurdanat Berkinǵalıdyń málimetinshe, óńirde ekpe egýden  922  otbasy bas tartqan. Sondyqtan sala mamandary  ekpe ektirmegen  ata-analarmen kezdesýler uıymdastyryp, monıtorıń júrgizgen. Nátıjesinde  ata-analardyń bas tartýyna 88,7 % dinı senim áser etse, 11,3 %-y vaksınaǵa senimsizdik tanytqan. Dinı basylymdarǵa kóz tastasaq,  Quran Kárim men Paıǵambar súnnetinde aýrýdyń aldyn alýǵa qarsylyq keltirilmegen. Hadıste Muhammed paıǵambar (s.ǵ.s): «Kimde-kim erte turyp, qurma jeıtin bolsa, sol adam aýrýdyń aldyn alady», – degen eken. Bul jerden ıslam dininde aýrýdyń aldyn alýǵa mańyz berilgenin kórýge bolady. Densaýlyqqa kóńil bólip, salaýatty ómir súrýdi nasıhattaıdy. Budan basqa, jyl saıyn qajylyq kezinde Saýd Arabıasyna barǵandarǵa aýrý juqtyryp, syrqattanbaýy úshin áýejaıda vaksınamen ekpe jasalatynyn aıtýǵa bolady. Iaǵnı, naǵyz musylman eli dep esepteletin Saýd Arabıasynyń ózinde vaksına júrgiziledi. Sondyqtan, ekpeni qabyldap, aýrýdyń aldyn alý da ıslam dinine saı nárse ekeni anyq.

Sonymen qosa elimizde QR Densaýlyq saqtaý jáne áleýmettik damý mınıstriniń «Halyqtyń nysanaly toptaryn profılaktıkalyq medısınalyq tekserip-qaraýdy júrgizý erejesin bekitý týraly»  buıryǵyna  sáıkes 0-18 jastaǵy balalarǵa profılaktıkalyq  tekserýler júrgizilýde. Bıylǵy jyldyń jeti aıy boıynsha oblysta 0-17 jas aralyǵyndaǵy 137 616 bala profılaktıkalyq tekserýden ótse, 16,7% balanyń aýrýy  erte anyqtalyp, 11,7 %-y dıspanserlik esepke alynyp, 72,3%-y  saýyqtyrý emin  qabyldaǵan.  

Gúlim AQAP,

Batys Qazaqstan oblysy