«QR keıbir zańnamalyq aktilerine búdjet zańnamasyn jetildirý máseleleri boıynsha ózgerister men tolyqtyrýlar engizý týraly» QR Zań jobasynda búdjet zańnamasyna 6 negizgi baǵyt boıynsha túzetýler usynyldy. Bul týraly QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysynda zań jobasyn tanystyrǵan ulttyq ekonomıka mınıstri Tımýr Súleımenov baıandady, dep habarlaıdy Qamshy.kz aqparat agenttigi Premer-mınıstrdiń baspasóz qyzmetine silteme jasap.
Mınıstr aıtyp ótkendeı, «QR keıbir zańnamalyq aktilerine búdjet zańnamasyn jetildirý máseleleri boıynsha ózgerister men tolyqtyrýlar engizý týraly» Zań jobasy Memleket basshysynyń 2017 jylǵy 31 qańtardaǵy Qazaqstan halqyna Joldaýynda bergen tapsyrmalaryn, Ulttyq qordy qurý jáne paıdalanýdyń jańa tujyrymdamasyn, sondaı-aq Parlament jáne Esep komıtetiniń usynymdaryn iske asyrý maqsatynda ázirlengen.
Zań jobasymen búdjet zańnamasyna 6 negizgi baǵyt boıynsha túzetýler usynylýda. Bul ortalyq jáne jergilikti deńgeılerdegi 1,5 myńnan astam qujatty qysqartýǵa múmkindik beredi.
Búdjettik baǵdarlamalardy iske asyrý kezinde ákimshiniń derbestigin keńeıtý aıasynda búdjetti naqtylaýsyz búdjettik jobalar arasynda qarajatty qaıta bólý múmkindigin qarastyrý usynyldy.
MJÁ jobalaryn jobalaý rásimderin jeńildetý maqsatynda barlyq úderisti 5-ten 3 kezeńge deıin qysqartý usynyldy. Bul MJÁ jobalaryn ázirleý merzimderin 7 aıdan 3 aıǵa deıin qysqartýǵa múmkindik beredi. Jańashyldyqtardyń biri «baǵdarlamalyq MJÁ» engizý bolyp otyr – jeke seriktesti irikteý men jobalardy iske asyrýdyń barlyq rásimderi qosymsha saraptama júrgizýsiz memlekettik jáne úkimettik baǵdarlamalardaǵy ár sala úshin jeńildetilgen formada jazylady.
«Sondaı-aq, búdjet úderisin jetildirýdiń basqa da máseleleri qaraldy. Jalpy usynylǵan túzetýler búdjet qarajatyn ekonomıkaǵa jyldamyraq jetkizýge, ıgerilmeý somasyn azaıtýǵa, MJÁ jobalarynyń sanyn arttyrýǵa, sondaı-aq úlken derbestik jaǵdaıynda memlekettik organdardyń úlken jaýapkershiligine septigin tıgizedi», – dep túıindedi T. Súleımenov.
