Osydan bir jyl buryn Qazaqstanda qoǵamdyq oryndardaǵy namazhanalardy jaýyp tastaǵan bolatyn. Muny QR Din jáne azamattyq qoǵam mınıstrligi namazxanalar memlekettik organdardan úsh júz metr shalǵaı jerde ornalasýy kerek ekenin, alaıda bolashaqta atalǵan erejege ózgerister engiziletinin aıtqan. Namazhanalardyń jabylýyna qatysty dintanýshy Qaırat Joldybaı da óz alańdaýshylyǵyn bildirgen edi. Qamshy.kz aqparat agenttigi de atalmysh máseleni kótergen bolatyn. 

Memlekettiń zaıyrly qaǵıdattarynyń saqtalýyn qamtamasyz etý jáne din jolyndaǵy azamattardyń suranysyna sáıkes, Din isteri jáne azamattyq qoǵam mınıstriligi qulshylyq bólmelerin (namazhana) ashýǵa jáne dinı ádebıetti satatyn kitap dúkenderine arnalǵan talaptardy qaıta qarady dep jazady Qamshy.kz aqparat agenttigi QR Din isteri jáne azamattyq qoǵam mınıstriligine silteme jasap.

Din isteri jáne azamattyq qoǵam mınıstri N.Ermekbaevtyń buıryǵymen dinı ádebıetti jáne dinı mazmundaǵy ózge de aqparattyq materıaldardy, dinı maqsattaǵy zattardy taratý úshin arnaıy stasıonarlyq úı-jaılardyń, sondaı-aq, ǵıbadat úılerinen (ǵımarattarynan) tys jerlerde dinı is-sharalardy ótkizýge arnalǵan úı-jaılardyń ornalastyrylýyn aıqyndaý jónindegi Jańa nusqaýlyq qabyldandy.

Jańa nusqaýlyqqa engizilgen jańashyldyqtardyń negizgisi – temir jol jáne avtovokzaldar, áýejaılar men porttarda dinı is-sharalardy ótkizýge arnalǵan qulshylyq bólmelerin ashýǵa qatysty shekteýdiń alynyp tastalýy. Atalǵan ózgeris – alys jolǵa shyǵyp, saıahattaıtyn dindarlardyń dinı qajettilikterin qanaǵattandyrý men olarǵa barynsha jaǵdaı jasaý maqsatynda engizilip otyr. Elimizge qonaq retinde keletin nemese el aýmaǵynda saıahattap júretin dindarlar ushaqtaryn nemese qatynaıtyn kólik túrlerin kútip, áýejaılar men avto jáne temirjol vokzaldarynyń kútý bólmelerinde uzaq ýaqyt boıy otyrýǵa májbúr bolyp jatady. Sondyqtan olardyń qulshylyq jasaýyna atalǵan ǵımarattarda arnaıy oryndar bolýy qajet.

Buryndary memlekettik organdardan 300 metr qashyqtyqta ornalaspasa, úı-jaılarda qulshylyq bólmelerin (namazhana) ashýǵa shekteý qoıylatyn, endi 300 metrge deıingi shekteý dinı bilim uıymdaryn qospaǵanda, tek barlyq bilim mekemeleriniń aýmaǵyna qatysty qoldanylatyn bolady.

Sonymen birge, qulshylyq etý bólmelerin ashqan ýaqytta qulshylyq jasaý úshin qajetti jaǵdaılardyń qamtamasyz etilýi úshin tıisti talaptar saqtalýy kerek. Dinı is-sharalardy ótkizýge arnalǵan úı-jaılardyń jalpy aýdany 20 sharshy metrden bastap 100 sharshy metrge deıin bolýy qajet, sondaı-aq, úı-jaılar kúzetti basqarý púltyna tikeleı shyǵatyn beınekameralarmen jabdyqtalýy tıis. Budan bólek, atalǵan úı-jaılar dáret alý úshin qajetti sanıtarlyq torappen qamtamasyz etilip jáne zańnamaǵa sáıkes sanıtarlyq-epıdemıologıalyq talaptarǵa saı bolýy kerek.    

Al qoǵamdyq oryndarda qulshylyq bólmelerin ashý nemese ashpaý sheshimin ǵımarat ıeleriniń ózderi qabyldaıdy, sondaı-aq, ashýǵa qajetti shyǵyndardy da óz qaltalarynan óteıdi.