Keshe Nú-Iork naryǵynda WTI surypty munaıdyń baǵasy rekordtyq kórsetkishke deıin quldyrady. AQSH-tyń Tehas shtatynda óndiriletin qara altynnyń bul túri birden 4 paıyzǵa arzandap, barreli 63,05 dollarǵa baǵalandy. Bul – 2009 jyldyń shildesinen beri tirkelgen eń tómengi baǵa. NTV.Ru. taratqan aqparatqa súıensek, baǵanyń kúrt tómendeýine naryqta qara altynnyń qory tym kóp degen málimet áser etken.
Munaıdyń baǵasy Eýropada da máz emes. Londondaǵy kontınentaralyq fúcherstik kelisimder bırjasyndaǵy sesıa qorytyndysy boıynsha, Brent markaly munaıdyń baǵasy 2,93 dollarǵa arzandap, barreli 66,14 dollarǵa jetti. Munaı qunynyń quldyraýy Munaı eksporttaýshy elder uıymynyń (OPEC) óndiriletin munaı kólemin qysqartpaý týraly sheshiminen bastaý alǵan bolatyn. Qara altyn naryǵyndaǵy turaqsyzdyq rúbl baǵamyna da qysym kórsetip tur.
Tım Fınlon, «Energy Analytics Group LLC» konsýltasıalyq kompanıasynyń dırektory: «Keıbireýler naryqtaǵy qazirgi jaǵdaıdy sátti saýda jasaý úshin taptyrmas múmkindik dep baǵalaýy múmkin. Alaıda, munaı naryǵy áli de taýarǵa toly. Baǵa tómendeı bermek. Naryqta turaqsyzdyq saqtalady».
Djın Makdjıllıan, «Tradition Energy» kompanıasynyń bas sarapshysy: «Munaı naryǵy shyńyraýdy izdep álek, biraq jýyq arada oǵan jete qoımaıtyn tárizdi. Uzaq merzimdi salymdarǵa beıimdelgen ınvestorlar bul naryqtan bastaryn ala qashýda. Óıtkeni quny joǵalǵan taýardy eshkim satyp alǵysy kelmeıdi».
"QazAqparat"
