«Qulaq sal, ulym. Júrek túbinde jatqan sózderimdi sen uıyqtap jatqanda aıtýdy jón kórdim. Birneshe mınýt buryn jumys bólmemde gazet oqyp otyryp, boıymdy ókinish bıledi. Men  óz kinámdi tolyq moıyndaımyn.

Kóńil-kúıim bolmaǵan kezde ashýymdy senen alǵanymdy oılap qatty ókindim. Sen mektepke barý úshin kıine bastaǵan kezińde, zattaryńdy jınaı bastaǵanda saǵan taǵar min taptym. «Aıaq-kıimińdi tazalamapsyń» dep kiná taqtym. «Kıimderińniń bireýin edenge tastap kettiń» dep daýys kóterip, aıǵaılaǵanym esimnen keter emes. Tańǵy asta da saǵan tıisetin syltaý taptym.

Sen aýlada oınap júrgende men jumysqa asyǵyp bara jatyr edim. Sen burylyp, qolyńdy bulǵap: «Ákeshim, saý bolyńyz!» dep aıǵaıladyń. Men bolsam saǵan qabaǵymdy túıip: «Jaǵańdy túze» dep zekidim.

Jumystan qaıtyp kele jatqanda seniń aýlada jerge tizerlep otyryp alyp sharmen oınap otyrǵanyńdy baıqadym. Shulyqtaryń jyrtylyp qalǵan eken. Seni aldyma salyp alyp úıge ákeldim. Bul áreketim arqyly joldastaryńnyń aldynda seni uıatqa qaldyrdym. 

Jumys bólmemde gazet oqyp otyrǵanda bólmege kelgeniń esińde me? Gazetten kózimdi alyp, maǵan kedergi keltirdiń degendeı ashýly kózben qaraǵan kezimde ne isterińdi bilmeı kire-beriste turyp qalyp ediń ǵoı. «Saǵan ne kerek?» dep senimen dóreki sóılesip edim. Sen jaýap bermediń, júgirip kelip moınyma asyldyń da, betimnen súıip-súıip aldyń. Odan keıin bólmeden shyǵyp kettiń.

Osy jaǵdaıdan keıin boıymdy túsiniksiz qorqynysh sezimi baýrady. Meniń ádetterim meni qandaı jaǵdaıǵa túsirdi? Seniń kishkentaı bala ekenińdi umytyp ketkendeımin. 

Kip-kishkentaı júregiń meıirimge toly. Muny men uıqyǵa jatar aldynda moınyma asylyp, betimnen súıgen kezińde baıqadym.

Erteńnen bastap men saǵan jaqsy áke bolamyn! Men senimen birge oınap, jaqsy til tabysyp ketýge tyrysamyn. Sen qaıǵyrǵanda birge qaıǵyryp, qýanǵanda birge qýanamyn. 

Men senen kóp nárseni talap etippin... Keshir, balam!

muslim.kz saıtynan alyndy 

Aýdarǵan: Eljas Ertaıuly

«Baqytty otbasy» otbasylyq keńes ortalyǵy