Taqyryptyń ózi kóptegen er adamnyń namysyna tıip ketýi ábden múmkin. Múmkin emes, namysyna tıedi.  Alaıda qoǵamda bolyp jatqan osyndaı soraqylyq deýge kelmes, árıne, kózge túrpideı tıetin dúnıeni aıtý kerek dep oılaımyn.

Keshe Dostyq Plaza oıyn-saýyq ortalyǵyna qurbylarymmen kúzdik kıim qaraýǵa barǵanbyz. Arnaıy stýdentterge arnalǵan arzandaý degen kıim dúkenderi  bolatynyn almatylyqtar jaqsy biledi. Kıim qarap júrgen kezde bir qazaq jigittiń áıeliniń sómkesin asynyp alǵanyn kórdim de, tańǵaldym. Qasymdaǵy qaljyńbas qurbym «podkablýchnık» degen osyndaı bolady eken ǵoı», ― dedi syńqyldap. Sosyn eriksiz qurbymnyń sózinen keıin kúldim.  Syrttaı qarap qurbylarymmen birge álgi erkekke bildirtpeı kúlip, kúlkige aınaldyrdyq. Bizdiki de durys emes. Sebebi kúletindeı emes, ashýlanatyndaı oqıǵa. Álgi kisi bizge qaraǵan kezde, basqa dúnıege kúlgendeı bolyp ony uıaltpaýǵa tyrystyq. Alaıda áıeldiń sómkesin asynǵan jigitti aqtaýǵa da bolady: múmkin áıeli kıim aýystyryp, sosyn áıeline berýge umytyp ketken shyǵar, kim biledi?!

Joǵarydaǵy jigitke túsinistikpen qaradyq delik. Biraq biz Dostyq Plazada 2 saǵat júrgenniń ózinde 5-6 jigittiń áıeldiń sómkesin asynyp júrgenin kórip, «padkablýchnıkter qaptap ketipti ǵoı» degen oıǵa keldik. Kóshede de, dúken de sómke asynyp júrgen erkekter.

Aıtpaqshy osy jerde eskerte keteıinshi, qasymdaǵy eki qyz da qazaqy aýyldyń qyzdary. Men Atyraýda dúnıege kelgenmin. Bólingendigim emes, alaıda batystyń jigitteri úıde áıelin tyńdap, «qoryqsa» da, syrtta júrgende ózinshe óz áıelin kózben jumsaıtyn erkek bolyp alady. Qasyndaǵy áıeliniń sómkesin asynyp dúken aralamaq túgili, bir sátke ustap turmaıdy. Óz basym Atyraýda 15 shaqty jyl turyp mundaıdy kórmeppin. Múmkin baıqamaǵan da shyǵarmyn... Biraq Almatydaǵydaı kóp emes ekenine senimdimin. Bul tek meniń jáne meniń keı qurbylarymnyń oıy. Al endi basqa da pikirlerdi saraptap kóreıik.

Kóshede jigit pen qyz kele jatyr. Jigit qyzdyń sómkesin asynyp alǵan. Men aýyr paketti meńzep turǵan joqpyn. Kádimgi siz oılap turǵan, áıel adamnyń kúndelikti ustaıtyn sómkesi jaıly aıtyp turmyn. Osy kezdegi úsh túrli qyzdyń pikirin nazaryńyzǵa usynamyn.

1-qyz: Qandaı ádemi kórinis. Ne degen sezim, mahabat deseńshi!  Jigit qyzdy qatty jaqsy kórip, syılaıdy eken. Meniń de osyndaı jigitim bolsa eken.

2-qyz: Myna jigit qazirden «padkablýchnık», úılengen soń qandaı bolady eken? Qyzynyń sómkesin asynyp alǵan túrine qarashy. Namys qaıda? Men mundaı jigitti janyma da jolatpas edim. Birtúrli ersi ǵoı.

3-qyz: Maǵan báribir. Biraq barlyǵyna túsinistikpen qaraý kerek. Múmkin qyz aýyryp turǵan shyǵar. Bul ómirde bári múmkin.

3 túrli pikir... Biraq bul ózekti másele ekenin umytpaý kerek. Qazirgi qoǵamda qazaq jigitteri usaqtalyp ketti degen pikir jıi aıtylady. Men bul pikirge qarsymyn. Barlyq qazaq jigitteri usaqtalyp ketpegen.  Alaıda jel turmasa shóptiń basy qozǵalmaıtyny ras qoı. Ózge ulttyń jigitteri kóshede qyzdyń sómkesi túgili ózin kóterip júrse de meniń eshteńem ketpeıdi. Alaıda qazaq jigitteri áıeline degen súıispenshilik pen syılastyqty kósheden góri úıde kórsetkeni durys. Qazaq jigitteri tarıhta alyp, batyr bolyp qalǵan, sizder de qorqaq, jasqanshaq emes, erjúrek, batyr bolyp qalyńyzdarshy ótinemin.

Ásel Bolatqyzy