Búgingi kúni syrtta júrip te, áleýmettik jelilerde de memlekettik qyzmetkerlerdiń jumysbastylyqtan, udaıy qosymsha saǵattardan jeke ómirge ýaqyty jetispeı jatqandyǵyn estip júrmiz.
Kóptegen qazaqstandyqtar jumysta baılanyp qalýdyń saldaryn sheneýnikterdiń durys jumys atqarmaýynan dep biledi. Óıtkeni qyzmetkerler shynynda da eńbek shartynda kórsetilgen saǵattardan tys ýaqytta da, lám-mım demeı jumysta qala beredi. Máselen, buryndary memlekettik qyzmette istegen, mınıstrlikte joǵary laýazymǵa ıe bolǵan qyzmetker jumystyń jeke ómir men ata-anasynyń ornyn qalaı basqanyn aıtty. Ol óz esiminiń qupıa saqtalǵanyn qalaıdy.
«Meniń tájirıbemde memlekettik qyzmette isteý jeke ómirime keri áserin tıgizdi. Mınıstrlikke jumysqa ornalasqan kúnnen bastap, onda basymmen kirigip kettim. Óıtkeni seni eshkim elemeıdi nemese jumystan shyǵaryp jiberedi. Alǵashqy kezderi qyzmetime barlyq ýaqytymdy jumsaǵanyma maqtan tutyp júrdim, alaıda ýaqyt óte kele ómirimniń 100 paıyzy tek jumystan turatyndyǵyn ańǵardym. Súıgen qyzymmen de aıyrylysyp kettik, dostarym da sırep, aralasatyn ortam da túbegeıli ózgerdi. Eń soraqysy, anamdy týǵan kúnimen quttyqtaýdy umytyp ketken kezderim de boldy. Biraq ol maǵan renjigen emes, óıtkeni anam meniń bolashaǵym úshin bar qarajatyn jumsap, sýpermemleket qyzmetkeri bolý úshin oqytty emes pe? »,- dedi ol ashshy mysqylmen.
Jigit nelikten jumysta qarańǵy túskenshe qalatyndyǵyn aıtyp berdi
Meniń jumys kúnim resmı túrde tańǵy 09:00 den 18:00-ge deıin bolatyn. Biraq esimde qalǵany tek bir ǵana ret ýaqtyly qaıttym, ol meniń týǵan kúnim bolatyn. Tipti, «mine jumys ýaqyty aıaqtaly, endi qaıta berýge bolady» dep otyrǵan sátte joǵarydan habarlasyp, jańa tapsyrma beredi. Bir kún ishinde qanshama aýqymda jumys isteseń de, áıteýir, qosymsha is tabylyp turady. Árıne, kóbine óz sheshimmen qalatynmyn, biraq olaı isteýime ne sebep ekendigi belgili emes pe? Qosymsha tólemaqy jaıynda aıta keter bolsaq, jaqsy kórsetkishke jetken qyzmetkerlerge syıaqy beriledi. Biraq, jumys saǵattarynan tys ýaqyt úshin eshqashan qosymsha tólemaqy berilgenin kórgen emespin».
Esterińizge sala keteıik, 9 qazan kúni QR Májilistegi úkimet saǵattarynda eńbek jáne áleýmettik qorǵaý mınıstri Tamara Dúısenovaǵa memlekettik qyzmetkerlerdiń bekitilgen ýaqyttan artyq jumys isteýi jóninde suraq qoıylǵan bolatyn.
Bul suraqqa mınıstr: «QR eńbek shartyna sákes, aptasyna 40 saǵattyq jumys ýaqyty bekitilgen. Eger artyq saǵattar jóninde aıtsaq, bir táýlikte 2 saǵattan artyq jumys berilmeýi kerek. Biraq bul kórsetkish aıyna 12 saǵattan aspaýy tıis. Osyǵan sáıkes, qyzmetker artyq jumys isteýge jazbasha túrdi kelisim berýi kerek»,- dep jaýap bergen bolatyn.
