21-22 qazan kúnderi Almaty qalasy ál-Farabı atyndaǵy QazUÝ-dyń sport kesheninde «Er Jánibek» halyqaralyq qoǵamdyq qorynyń uıymdastyrýymen shaǵyn fýtboldan dástúrli «ER JANIBEK CUP-2017» halyqaralyq týrnıri ótedi, dep Qamshy.kz aqparat agenttigi habarlaıdy.
Bıylǵy kýbok belgili ǵalym, fılologıa ǵylymdarynyń doktory, profesor Tursynbek Kákishevtiń 90 jyldyq mereıtoıyna jáne Alashorda qozǵalysynyń 100 jyldyǵyna arnalyp otyr.
Shaǵyn fýtboldan ótetin halyqaralyq týrnırdiń maqsaty – Qazaq ádebıeti ǵylymyna ólsheýsiz úles qosqan zerdeli ǵalym, qazaq ádebıeti synynyń kórnekti ókili, fılologıa ǵylymdarynyń doktory, profesor Tursynbek Kákishevtyń eńbegi men ónegeli ómirin jastarǵa úlgi etý. Sondaı-aq, shetelde turatyn qazaq jastaryna Táýelsiz qazaq eliniń tynys-tirshiligin tanystyrý, sporttyq oıyn arqyly atajurtymen mádenı-rýhanı baılanysyn nyǵaıtýdy maqsat etedi.
«Er Jánibek» halyqaralyq qoǵamdyq qorynyń «ER JANIBEK CUP» týrnıri – bıyl İİİ ret ótkizilgeli otyr. 24 komanda baq synaıtyn jarystyń júlde qory 2 mıllıon teńge. Dúnıejúzi qazaq jastaryn shaqyrǵan fýtbol týrnırine Fransıa, Túrkıa, Qytaı, Reseı (Omby, Saratov qalalarynan), Mońǵolıa, Iran, Ózbekstan jáne Qyrǵyzstanda turatyn qazaq jastarynan quralǵan fýtbol komandalary qatysady. Sonymen qatar, Almaty men Astana qalalarynan jáne elimizdiń ár oblysynan keletin sportshylar oıyn kórsetedi.
Týrnırge Dúnıejúzi qazaqtary qaýymdastyǵy, QR Mádenıet jáne sport mınıstrligi, Almaty qalasynyń ákimshiligi, ál-Farabı atyndaǵy Qazaq ulttyq ýnıversıteti qoldaý kórsetip otyr. Týrnır kezinde shaǵyn etnoaýyl tigilip, qolóner kórmesi ótetinin de habarlaımyz!
