«Qazaqstan turǵyn úı qurylys jınaq bankiniń» klıentteri úshin qajetti qujattar sany edáýir qysqardy. Endi bank kelisimshart jasaý úshin azamattyń tek jeke kýáligin suraıdy. Baǵdarlamaǵa «Jas otbasylarǵa arnalǵan turǵyn úı» baǵyty boıynsha qatysýshylar jeke kýálikke ákimdiktiń joldamasyn qosa alyp kelýi tıis. Al «Barlyq sanattaǵy azamattarǵa arnalǵan turǵyn úı» baǵyty boıynsha jeke kýálik pen jalaqy týraly anyqtama qajet bolady. Sondaı-aq «Qoljetimdi baspana-2020» baǵdarlamasynyń qatysýshylary baǵdarlamaǵa qatysýǵa jáne tólem qabiletin baǵalaýǵa ótinish bergeni úshin ustalatyn komısıadan bosatyldy. Iaǵnı, klıenttiń 15 myń teńgesi qaltasynda qalady. Sonymen qatar, tólem qabiletin rastaýǵa jáne kredıttik ótinimdi rásimdeýge qujattar tapsyrý kezinde klıentter toltyratyn qujattar sany da qysqarǵan. «Jas otbasylarǵa arnalǵan turǵyn úı» baǵyty boıynsha qatysýshylar aı saıynǵy jınaq jarnasyn úzbeı tólese nemese merziminen buryn salyp qoısa boldy, tólem qabiletin rastamasa da bolady. Tabysty rastaý erejesi ózgerdi. Jumys ornyn aýystyrǵan azamattardan endi alty aıdyń ornyna úsh aıdyń tabysy talap etiledi.