Jýyrda Batys Qazaqstan oblysy ortalyǵy Oral qalasynda joǵarǵy medısınalyq kolej negizinde oqytý-klınıkalyq ortalyǵy ashyldy.
BQO densaýlyq saqtaý basqarma basshysynyń damý jáne uıymdastyrý jónindegi orynbasary Nurdanat Berkinǵalıdyń aıtýynsha, bul ortalyq sımýlásıalyq trenajerler men robot-mýlájdar arqyly kásibı biliktiligin arttyramyn degen dárigerge úlken múmkinshilikter bermek. Jas dárigerler emdeý sharalaryn mýlájdarǵa qoldanyp, tájirıbeden ótkizýde. Osy oraıda aıta ketsek, 2016-2019 jyldarǵa arnalǵan «Densaýlyq» memlekettik baǵdarlamasynda densaýlyq saqtaý júıesin damytý úshin halyqtyń qoljetimdi, tolyqqandy, sapaly medısınalyq qyzmetterge muqtajdyǵyna ıkemdi jaýap beretin ınfraqurylymdy qalyptastyrý qajettigi aıtylǵan edi. Densaýlyq saqtaý uıymdary úshin aýrýhanalardaǵy medısınalyq qural-jabdyqtardyń alar orny erekshe. Jańadan ashylǵan ortalyqtaǵy kýrsanttar zamanaýı dárisqanalardan teorıalyq bilim alsa, oblystyń túkpir-túkpirinen kelgen dárigerler men meıirbıkeler akýsherlik jáne gınekologıalyq járdem kórsetý, júrektiń toqtaý qaýpin aldyn alý, terapıa men pedıatrıada jáne hırýrgıada sapaly kómek kórsetý bólmelerinde praktıkalyq bilimderin shyńdaıdy. Sondaı-aq IT-tehnologıalardyń kómegimen debrıfıngtik zalda keri baılanys arqyly em-shara barysynda jibergen qatelikterin beınemonıtorda aıqyn kóre alady. Oqytý-klınıkalyq ortalyqta bilimin jetildirgen 51 joǵary jáne orta bilimdi mamandar otandyq jáne sheteldik dárigerlerden sabaq alyp, sertıfıkatqa ıe boldy.
Sondaı-aq medısınalyq bilim berý baǵdarlamalaryn jetildirý sheńberinde arnaýly medısınalyq oqý oryndarynda oqıtyn óńirdegi stýdentter zamanaýı etıkalyq standarttardy, komýnıkasıalyq daǵdylardy, bilim alý jáne ony ustap turý úshin jetkilikti deńgeıde aǵylshyn tilin meńgerýdi kezeń-kezeńimen oqýda.
