Halyk Bank ıeligindegi Qazkom banki men Visa kompanıasy Qazaqstanda ınternet-bankıngtegi Homebank Pay servısin iske qosqandyǵyn málimdedi. Onda TMD men Eýropada áli joq tólem júıesi tanystyryldy dep jazady Qamshy.kz.
Atalǵan tólem júıesi tutynýshylarǵa QR kodty skanerleý arqyly tólem júrgizýge, al saýda oryndary men qyzmet kórsetetin kásiporyndar úshin ýaqyt únemdeýge, POS termınaldarǵa shyǵyndanbaýǵa septigin tıgizedi. Ol úshin tutynýshy kez-kelgen óndiris ıesiniń biregeı QR kodyn skanerleýi, sáıkesinshe qajetti tólem somasyn engizýi jetkilikti. Al, óndiris oryndary men qyzmet kórsetýshiler bankten óz shotymen baılanysty menshikti QR kod alady.
Tólem júıesine arnalǵan baspasóz konferensıasynda Halyk Group basqarma tóraıymy Úmit Shaıahmetova «Biz shaǵyn bıznes salasyndaǵy kásipkerlerdi qolma-qolsyz aqsha tólemine ótýdi jeńildetetin ekvaırıńtegi jetekshi banktiń sheshimin qýana usynamyz», dep tanystyrdy. Onyń aıtýynsha QR kodty tólem júıesi memleketke de paıdaly. Osy arqyly kóleńkeli aqsha aınalymy azaıady.
Konferensıa barysynda Qazkom bankiniń basqarýshy dırektory Nurlan Jaǵyparov sońǵy jyldaǵy bank tutynýshylarynyń ınternet-bankıng pen qolma-qolsyz tólem jasaýda belsendilik tanytqanyn atap ótti. «Eldegi kez kelgen jeke kásipker kontaktisiz tólemderdi qabyldaı alady. Sonymen qatar bul servıs tólem qabyldaý ınfraqurylymdaryna eshqandaı ınvestısıany qajet etpeıdi. Android nemese iOS júıesindegi smartfondarǵa ornatylatyn qosymsha arqyly Qazaqstannyń kez kelgen saýda núktesinde ońaı ári qaýipsiz túrde qalaǵan tólemińizdi jasaı alasyz», - dedi ol óz sózinde.
Jýrnalıser suraqtaryna jaýap bergen bank basshylarynyń sózinshe, atalǵan qyzmetti Almaty men Astana qalasynyń turǵyndary qarasha aıynan bastap, al tutas Qazaqstan jáne Reseı, Tájikstan sıaqty TMD elderi 2018 jyldyń basynan paıdalana alady. Qazkom tutynýshylary úshin QR kod arqyly tólem jasaý aldaǵy ýaqytta Halyk Bank klıentterine de qoljetimdi bolady. Tólem jasaý men qabyldaý da komısıasyz.
Visa-nyń Ortalyq Azıa elderindegi aımaqtyq menedjeri Ǵalym Tabyldıev Qazaqstan narǵynyń qarqyndy damyp jatqanyn ataı kele, «Atalǵan tólem júıesi EMVC seriktestigimen álemniń túrli elderinde QR kod tehnologıasynyń tájirıbesi eskerile otyryp, Visa-men ázirlengen bolatyn. Bul ashyq standarttarmen jumys isteıtin ındýstrıanyń damýyna, memlekettiń sandyq ekonomıkaǵa tez ótýine yqpal etedi», - dep atap ótti.
Aıta ketsek, QR-kod arqyly tólem jasaý Koreıa, Qytaı elderinde, Ońtústik Azıada qoldanysta bar.
