Qazaqstan Prezıdenti N.Nazarbaevtyń telesuhbaty elimizdiń birineshe telearnasynan kórsetildi. Ártúrli taqyrypty qamtyǵan suhbat áleýmettik jelide qyzý talqanyp jatyr.

Facebook áleýmettik jelisin qoldanýshylar arasynda telesuhbat tushymdy bolmaǵanyn, Qazaqstandaǵy qazirgi jaǵdaı ıaǵnı, "benzın tapshylyǵynyń sebebin, úı baǵasynyń qymbattyǵyn" aıtpady dep jazady. Al, kerisinshe "Prezıdenttiń osy suhbattaǵy táýelsizdik týraly..." aıtqan oılaryn jalpy qoǵamǵa násıhattaý kerektigin jazǵandar da bar. Sondaı-aq, jelidegi jazbada qandaı máselelerdiń aıtylman qalǵandyǵy da jazyldy. Budan bólek, Prezıdentpen suhbattasqan jýrnalıserge kásibı mamandar turǵysynan biraz syn aıtyldy.

Aqberen Elgezek, aqyn, "Ult" portalynyń bas redaktory:

- Eger Prezıdenttiń osy suhbattaǵy táýelsizdik týraly, memlekettilik, til, dil týraly aıtqandaryn Úkimet músheleri, ákim-qaralar, telearna men baspasóz basshylary uran qyp ustap, barlyq jerge ilip, teledıdardan kórsetip, gazet-saıttarǵa basyp, ýlardaı shýlamasa, onda bul jaı ǵana jáne kezekti ret halyqty bala sıaqty aldaı salý dep bilemin. Qandaı sózder deseńizder, tizip bereıin.

Nursultan Nazarbaev: "Tilimizdi, dinimizdi, ulttyǵymyzdy saqtap qalǵan qazaq halqy qandaı keremet!Eshqaısysymen qosylyp ketken joq..."

"Ǵalymdarǵa aıtyp, tıisti jumystardy istep kele jatyrmyz. Bizdiń jastar men jalpy qazaq halqy elimizdiń myń jyldyq tarıhy bar ekenin bilýi kerek..."

"Halyq óz basshylaryn saılaǵan kezde sol basshyǵa tizgindi qolyna berip: «bizdiń jaǵdaıymyzdy oıla» degen tilegin aıtady. Aıtylmasa da, halyq amanatynyń maǵynasy sol. Sondyqtan da, Prezıdenttiń, el basqarǵan adamnyń moınyndaǵy júktiń aýyrlyǵy osynda. Bolashaqtan kele jatqan oqıǵalardy bilip, tuspaldap, saraptap, soǵan qarsy aldyn ala qıyndatpaý máselesi..."

"Biz Eýrazıalyq ekonomıkalyq odaqqa qosyla otyryp, ózimizdiń úshinshi eldermen baılanysymyzdy joǵaltpaımyz, ol eshqandaı shartqa qaıshy da emes..."

Jalǵas Ertaı, bloger:

- Halyq teńgemen aılyq alady, teńgemen saýda jasaıdy, dedi prezıdent. Aıtpaǵy - teńgeniń qunsyzdanýy halyqtyń jaǵdaıyna áser etpeýi kerek degenge kelip tur. Al, elimizge keletin, halyq tutynatyn taýardyń basym kópshiligi ımport ekenin aıtýdy umytyp ketti. Tipti, benzın de ımporttalady ǵoı. Ol degenińiz - otandyq taýarlardyń da baǵasy sol ımporttyń baǵasyna tikeleı táýeldi degen sóz. Ochm, Pýtınniń rıtorıkasynyń tikeleı kálkasy boldy, osy jeri.

Rýslan Medelbek, Azattyq radıosynyń tilshisi:

 - Nazarbaev halyqty ár sózimen dollardyń ósýine daıyndap jatqandaı kórindi... Eshkim benzın tapshylyǵynyń sebebin, úı baǵasynyń qymbattyǵyn, Astanadaǵy úılerdi súrý, opozısıalyq basylymdardyń jabylýy týraly suramady. Byltyrǵy suraqtar hám byltyrǵy jaýaptar...

Dına Tólekova, telejýrnalıst:

- Qazaqtyń Larrı Kıngteri qaıda? Pozneri qaıda? Prezıdentten suqbat alyp otyrǵan kimder? 25 pen 30 jastaǵy jas jýrnalıser men dıktorlar. Sózine el senetin, eldi sendiretin tájirıbeli, salıhaly oı aıtatyn, Prezıdentpen áńgimesi jarasa ketetin, jasy eń qurǵanda elýden asqan myqty ıntellektýal tilshiler, tereń analıtıkter joq pa? Bári bas shulǵı qatyp qalǵan, jasandy kúlki. Dıskýssıa joq. Aralarynda baılanys baıqalmaıdy. Prezıdent pen jas tilshiler arasyndaǵy alshaqtyq - 50 jas!!! Jattandy suraqtar, jasqanǵan jastar. Obshym - jasandylyq kózge uryp tur.

Qýandyq Shamahaıuly, halyqaralyq jýrnalıs, QR mádenıet qaıratkeri:

- Jasy jetpisten asqan aqsaqalǵa, jaı bireý emes memleket basqaryp otyrǵan iri saıası tulǵaǵa nemeresimen jasty jas kelinshektiń mahabbat, sezim týraly suraq qoıýy, oǵan erekshe yqylaspen jaýap berilýi ádepke saı kele me? Qazirgi qoǵamdy qatty tolǵandyryp otyrǵan ózekti másele me edi, sol?! Aqordada otyryp alyp osyndaı áńgime efır arqyly da aıtylady eken-aý!

... Sosyn, taǵy bir nársege tań qalǵanym sol ádemi jigitter men qyzdar ana kisige unaıtyn suraqtardy qalaı taýyp qoıa beredi-eı, tem bolee na rýsskom ıazyke? Dıalog pa, monolog pa?

Aıdos Jumahanuly, jýrnalıs:

Názıa Joıamergenqyzy, "Túrkistan" halyqaralyq gazetiniń jýrnalısi:

 - Nege? Tikeleı efırde nege ótkizilmedi? Suraqtar nege ótkir emes? Kez kelgen taqyryptaǵy suraqtarǵa jaýap berýge prezıdenttiń bilimi men biligi jetedi. Dál qazir tyǵyryqqa tirelgen Pýtınniń ózi ótkir suraqtardan qashqan joq. Kezdesýdi uıymdastyrýshylardyń kózdegeni ne? Sobchak qurly bolmady ma bizdiń jýrnalıser? "Saıqymazaq" suraqtarmen kimdi mazaq qyldy?!

Derekkóz: "Túrkistan" basylymy