Meıirimi sheksizdiń jaratylysymen qurylǵan bul dúnıege keıde meıirimdilik jetpeı jatady. Adamdar qara basynyń qamymen kúndi uıasynan atyryp ta, batyryp ta jatyr. Ómir degenniń jalǵan ekenin keıbiri kesh túsinse, keıbireý erte túsinedi, bázbireýler ómir baqı túsinbeı ótedi. Sadaqa berýge 10 teńgesin qımaǵandar, araq-sharapqa aqshasyn aıamaıdy. Osylaı Jer óz osin de, Kúndi de aınalyp, ýaqyt ótýde. Men de sondaı jandardyń biri edim. Alaıda ómirimdi túbegeıli ózgertken bir jan, bir oqıǵa bar. Sol oqıǵany men óle ólgenshe umytpaıtyn da shyǵarmyn... Ómirimdi 180 gradýs túgili, 360 gradýsqa ózgertken sol bir jannyń kúlimdegen beınesin de, aıtqan ǵıbratty oqıǵasyn da máńgilikke jadymda saqtaımyn. Meniń pánı men baqı dúnıede de baqytty bolýyma kepil bolatyn amaldar jasaýyma sebepker bolǵan da sol jan, sol bir kesh...
Jer sharynyń kishkene bir bólshegi ispetti adamdardyń ortasynda Aısha degen qyzben óte jaqsy aralasamyz demesem de, tanys edik. Onyń is-áreketi men júris-turysy da ózgelerden erekshelenip, daralanyp turatyn. Jumysyna da, otbasyna da adal ekeni kórinip tur. Únemi kúlip, bal-bul jaınap júretin. Oǵan súısine de, qyzyǵa da, qyzǵana da qaraıtynymdy moıyndaımyn. Onyń birde-bir ret qabaq shytyp ashýlanǵanyn nemese jabyrqaǵan sátin kórmeppin. Ýaqyt óte kele men Aıshany ózime jaqyn tarta bastadym, onymen aralasyp, syrlasqym keldi.
Ol baı-baqýatty adamǵa kúıeýge shyqqan shyǵar dedim ishteı. Alaıda Aıshamen jaqsy aralasqannan keıin meniń pikirim qate ekenin uqtym, óz-ózimnen, Aıshadan uıaldym. Onyń kúıeýi men oılaǵandaı baı emes, qarapaıym jigit bolyp shyqty. Aıshanyń kúıeýge shyqqanyna 5 jyl bolsa da, áli kúnge deıin bala súıe almaı júr eken. Biraq, qalaısha?! Aısha ne úshin únemi kúlip júredi? Osy suraq meni únemi mazalaıtyn... Bir kúni jumystan keıin Aısha kúıeýiniń jumys barysymen basqa qalaǵa ketkenin, úıde jalǵyz qalatynyn aıtyp, meni úıine qonaqqa shaqyrdy. Men bir jaǵynan uıalsam, bir jaǵynan qýanǵan edim. Sebebi, sol keshte ol meniń suraǵyma da jaýap berdi...
Aısha ekeýmiz tamaqtanyp bolǵan soń, ol quptan namazyn oqydy. Men namaz týraly estigenim bolmasa, namaz oqyp jatqan adamdy alǵash kórýim edi. Namaz oqyǵan adamdy ǵana emes, únemi kúlimdep júretin Aıshanyń namaz kezinde eńkildep jylaǵanyn kórdim... Iá, men tanıtyn, men biletin Aıshanyń kózinen monshaqtap jastar aqty. Alaıda namazyn aıaqtap, kóz jasyn kórsetkisi kelmegendeı súrtip, maǵan qarap qaıtadan kúlimdedi. Alaıda bul kúlki men buryndary kórgen kúlkiden bólek. Júreginde jarasy bar adamnyń eriksiz kúlkisi... Ol kórsetkisi kelmedi, men kórmegendeı keıip tanyttym...
Bir kezde men ózimniń ómirimde bolǵan jaýapsyz mahabbattym jaıynda aıtyp berdim, al ol bolsa meni uıyp tyńdady. Arasynda aqylyn aıtyp, qoldap qoıdy... Birazdan soń men Aıshadan kúıeýimen qalaı tanysqany týraly suradym. Ol kúlimdep, sol bir sátterdi saǵynyshpen eske alyp aıtyp berdi.
«Ol kezde men stýdent edim. Oqý oqyp, qosymsha jumys jasap júrdim. Keıin qasymdaǵy qurbymnan namaz oqýdy úırenip, dinı bilimimdi nyǵaıtýǵa tyrystym. Armandap, ańsap júrip oramalymdy da taqtym. Bári óz retimen, oıdaǵydaı bolyp jatty. Únemi kóshede júrgen kezde aýyr sómke kótergen áıeldi kórsem, mindetti túrde kómektesetinmin. Sebebi, meniń anam aýylda jalǵyz turatyn. Kómek kórsetip bara jatqanda, únemi «Ia, Allam meniń anam aýyr sómke kóterip bara jatqanda oǵan da bir jaqsy adam kómek kórsetsinshi, qol ushyn sozsynshy», — dep ishteı jalbarynatynmyn. Ákemnen erte aıyrylǵaly, anamnyń men úshin qandaı qıyndyqqa tótep bergenin kóretinmin, kómekteskim keletin, átteń, qolymnan kelmeıtin.
Ýaqyt óte kele jaqsy jumys taýyp, anama alǵan syılyqtarymdy qushaqtap, aýylǵa bardym. Ol kezde ýnıversıtet aıaqtap, bir-eki jyl jumys jasap, úlken qalada kún kórip júrgenmin. Biraz qarajat jınap alǵasyn anamdy da qalaǵa alyp ketýge kelgem. Kelsem úıdegi jaryqty jasy menimen shamalas bir jigit jóndep jatyr eken. Báseń daýyspen amandasyp, anamnyń ystyq qushaǵyna tyǵyldym, jupar ıisin ıiskep, maýqymdy bastym. Álgi jigit jaryqty jóndep bolǵan soń, anam tilegi men alǵysyn aıtyp shyǵaryp saldy. Anam meniń qaladaǵy barlyq jańalyǵymdy tyńdap bolǵan soń, álgi jigit týraly aıta bastady. Ol únemi meniń anama kómektesip júretin, namazyn qaza qylmaıtyn jigit eken. Esimi Rasýl. Birden ózimniń anam úshin jasaǵan duǵamnyń qabyl bolǵanyn túsinip, shúkir ettim. Nege ekenin bilmeımin sosyn,Alla erli-zaıyptylardy teń-teńimen qosatyny týraly sózder esime tústi. Nege ekenin ol kezde túsinbedim. Biraz ýaqyt ótkesin Rasýl anama meni unatatynyn aıtqan eken. Birneshe kún qyrsyǵyp júrgenimmen, Rasýldy ózimniń de unatatynymdy túsindim. Kóp ýaqyt ótpeı dúrkiretip toı jasamasaq ta, salt-dástúrge saı shaǵyn toı jasadyq. Rasýldyń ata-anasy erte qaıtys bolyp ketkendikten, toıǵa tek alys-jaqyn týystary keldi. Anamyz bizge Paıǵambarymyz (S.Ǵ.S.) ben Aısha anamyzdyń (r.a.) kirshiksiz sezimin tiledi.Osylaı biz ózimizdiń jasaǵan jaqsylyǵymyzdyń sebebimen otbasyn qurdyq. Anamdy qalada bizben birge turady dep oılaǵanbyz. Alaıda men turmysqa shyqqan soń óz shańyraǵynda qaıtys boldy. Meni senimdi adamǵa tapsyrdy da, o dúnıege attandy», - dedi ol kózine jas alyp. «Alaıda bul taǵdyr», — dedi de qaıta kúlimsiredi.
Ertegi tyńdaǵandaı boldy, kóz aldyma elestettim... Ne degen erekshe tanysý, keremet, kirshiksiz sezim men senim... Qyzyqtym, qyzǵandym... Anasynyń qaıtys bolǵanyna ishteı qynjyldym. Alaıda ár adamnyń ólsheýli ýaqyty bar ekenin belgili edi...
Birazdan keıin men taǵy suraq qoıdym. «Seniń otaý qurǵanyńa biraz jyl bolsa da naǵyz baqytty sezine almaı júrsin, biraq nege únemi kúlip júresiń?»,- dedim men. Suraqty qalaı qoıǵanymdy ózim de baıqamaı qaldym... Biraq meniń suraǵym onyń júzindegi kúlkini óshirmedi. Oılanbastan, bunyń jaı ǵana synaq ekenin aıtty. Sosyn sózin bylaı jalǵady: «Musylmannyń ózge musylmanǵa kúlimsirep qaraýy sadaqa degen maǵynadaǵy sózdi oqyǵannan bastap kúlimsirep júretin boldym. Eń bolmasa osylaı jaqsylyq jasaıyn dedim. Únemi jabyrqap júrgennen eshteńe utpasym anyq qoı. Kerisinshe utylǵanym kóp bolar edi. Al kúlimsirep júrýden esh zıan kórmedim. Meniń kúlimsiregenim eń bolmasa bir adamnyń kóńilin kóterse, onyń ózi jaqsylyq emes pe?!».
Osy sózinen keıin men de oılana bastadym. Kúlimsirep júrý sonshalyqty qıyn emes. Jaqsylyq jasaýdyń eń ońaı tásili de osy sekildi. Osyndaı oımen uıqyǵa kettim...
Tańerteń tura sala aınaǵa qarap kúlimsiredim... Eshqandaı qıyndyq joq eken. Meniń de qolymnan keledi. Tańerteńgi asty Aıshamen birge iship, jumysqa keremet kóńil-kúımen bardym. Jumys kúnim keremet ótkenin baıqadym. Osylaı kúnim zýyldap ótip jatty. Kóshede de, jumysta da jaqsylyq jasaýǵa asyqtym. Alǵashynda Aıshadan dinı kitaptardy alyp oqydym. Keıin namaz oqyp ta úırendim, alǵash ret Aıshanyń ana atansa dep duǵa jasadym. Ómirim gúlge aınalǵandaı boldy. Basymyzdy aýyrtyp júrgen máseleniń jaqsylyq pen duǵa jasaǵan kezde joq bolatynyna kózim anyq jetti. Men de otbasy qurdym, Aısha ekeýmiz de ana baqytyna ıe boldyq. Qarapaıym tirshilik bolsa da,eń bastysy baqyttymyz!
Jaqsylyq jasaý sonshalyqty qıyn emes. Jaı ǵana nıet bolsa bolǵany. Osyndaı jaqsylyq jasaýǵa degen qyzyǵýshylyq arqyly jer ǵalamsharyndaǵy kózge kórinbeıtin, tanymal emes adamnyń ómiri osylaı ózgerdi. Sol bir kesh, sol bir jan ózgertti...
Ásel Bolatqyzy
