Qazaq jazba ádebıeti negizin qalaýshylardyń biri, kórnekti aqyn, aǵartýshy, dinı qaıratker Aqyt Úlimjiuly týraly Mońǵolıada taǵy bir kitap jaryq kórdi dep habarlaıdy Qamshy.kz aqparat agenttigi. Kitaptyń avtory Mońǵolıa Ǵylym Akademıasynyń jetekshi ǵylymı qyzmetkeri, tarıh ǵylymdarynyń doktory (Sc.D), profesor  Hýrmethan Mýhamadıuly. Jaýapty redaktory zertteýshi Shynarbek Seıithanuly.

Atalmysh kitap Aqyt Úlimjiulynyń týǵanyna 150 jyl tolýyna oraı, aqyn jaıly zertteýler jáne sonaý 1895-jyldardan Qazan qalasynda Shaǵataı álipbıinde jaryq kórgen Aqyt shyǵarmalarynyń túp nusqalary qamtylǵan tuńǵysh kitap.

Buǵan deıin QHR, Túrkıa, Qazaqstan, Mońǵolıada ǵulama aqyn Aqyt Úlimjiuly jáne onyń shyǵarmalary týraly birneshe kitaptar jaryq kórgen. Biraq aqynnyń  Qazan qalasyna bastyrǵan kitaptarynyń túp nusqalary búginge deıin jaryq kórmegen. Sondyqtan bul kitap Aqyttanýshylar men tarıhshylar úshin asa  qundy eńbek ekeni belgili.