Ertede bir patsha ómir súripti. Sol patshanyń elin qaıyrshylar jaılapty. Osyǵan baılanysty patsha ámir etipti:
Kimde-kim qandaıda bir qaıyrshyǵa birdeńe beretin bolsa, qolyn shabamyn! - depti.
Sol patshanyń eline jaqyn jol boıynda bir saýdagerdiń kerýenin qaraqshylar tonap ketipti. Sóıtip álgi saýdager aýyl shetindegi bir úıdiń esigin qaǵypty. Esikti bir ádemi qyz ashypty. Qyzym, bir úzim nan men bir kese sý bershi! - depti saýdager.
Qyz bolsa patshanyń jarlyǵy týraly aıtypty. Eger men sizge birdeńe bersem, qolymnan aırylamyn,-degeninde,men qaıyrshy emespin,saýdagermin. Jolda qaraqshylar kerýenimdi tonap ketti.
Osy jerge 3-4 kúnde ázer jettim, - dep saýdager jaǵdaıyn aıtady. Qyz jany ashyp, Allaǵa táýekel etip, bir kese sý men eki kúlshe nan alyp shyǵyp beripti. Bul áńgime dereý patshanyń qulaǵyna jetedi.
Muny estigen patsha ashýlanyp, jendetterine, tez qyzdy taýyp, eki qolyn shaýyp tastaýdy buıyrypty. Jendetter qyzdy taýyp, eki qolyn shaýyp tastapty. Sodan biraz ýaqyt ótken soń, patsha el aralap júrse, shetki bir úıden óte muńdy áýen estipti.
Patsha álgi úıge mán-jaıdy bilip kelýge adamdaryn jiberipti. Patshanyń jibergen adamdary onda bir óte ádemi qyzdyń baryn aıtyp kelipti. Biraq eki qoly joq eken depti. Joǵy qalaı, qolsyz týylypty ma? - dep surapty patsha. Joq, ol qyz bir qaıyrshyǵa tamaq berip, sizdiń ámirińizben qoly shabylǵan eken depti. Munsha zalym bolmasam netti? - dep patsha qapalanypty.
Sodan patsha nede bolsa osy qyzǵa úılenemin dep sheshipti. Aqyry patsha qyzǵa úılenipti. Sonda da qyzdyń júregi jibimepti.Qyz patshadan uldy bolady. Biraq qyz ol jerde turǵysy kelmeı, báribir qashyp ketemin dep júripti.
Sóıtip bir kúni túnde ulyn alyp saraıdan qashyp shyǵypty. Taý-tasty kezip,uzaq jol júrip bir darıaǵa kez bolypty. Qatty shóldep sý isheıin dese qoly joq ,eńkeıip sý ishýge yńǵaılana bergeninde balasy sýǵa túsip ketip, aǵa jóneledi.
Qutqarýǵa eki qoly joq,kókke qarap: Ia, Rabbym, ulymdy qutqara gór!-dep, Allaǵa jalbarynyp, duǵa jasapty. Meıirimi sheksiz Alla sol mezette eki perishteni jaratypty. Bireýi kelip duǵa oqyp, sýdy artqa qaraı aǵyzyp,ulyn qutqarypty. Al ekinshi perishte:
Qyzym, qolyńdy sýǵa sal!-depti. Qyz qolyn sýǵa salǵan eken, Allanyń ámirimen eki qoly kesilgen jerinen ósip shyǵypty. Allanyń qudiretine razy bolǵan qyz kókke qarap duǵa jasapty.
Sol kezde álgi eki perishte keri qaraı ketip bara jatypty.Jaqsy adamdar, sizder kimsizder, sizder úshin qandaı duǵa jasap, qalaı rahmetimdi aıtarymdy bilmeı turmyn? -dep qyz tańyrqap turyp qalypty.
Sonda adam keıpindegi eki perishte: Sen bizdi tanymadyń ba,biz seniń sadaqaǵa bergen eki kúlshe nanyńbyz, sadaqa-túrli báleni qaıtarady,- dep ǵaıyp bolypty.
Serik Ahmetovtyń Facebook paraqshasynan
