Eldiń jumys kúshi mol aımaqtary sanalatyn Almaty, Qyzylorda, Mańǵystaý oblystarynan SHQO Rıdder qalasyna kóship kelgen 22 otbasy jańa páterge ıe bolyp, tolyǵymen jumysqa ornalastyryldy. Qonys aýdarýshylarǵa páter kiltin QR Premer-mınıstrdiń orynbasary Berdibek Saparbaev pen SHQO ákimi Danıal Ahmetov tabystady, dep habarlaıdy SHQO Aqparatyq ortalyǵy.
SHQO qonys aýdarýshylardy ornalastyrý birinshi bolyp Rıdder qalasynan bastaldy. Saltanatty rásimge arnaıy kelgen QR Premer-mınıstrdiń orynbasary B. Saparbaev atalmysh baǵdarlamanyń maqsat-múddesin aıtyp ótti. «Elimizdiń ońtústik óńirlerinde jumyssyzdyq baıqalsa, SHQO jumys kúshi tapshy. SHQO boıynsha 18000, al Rıdder qalasynyń ózinde 700 jumys orny bos tur. Sondyqtan, Elbasynyń jumyssyzdyqty joıý týraly tapsyrmasyn negizge ala otyryp, elimizdiń ońtústik óńirlerinen tilek bildirgen otbasylardy kóshirý naýqany bastaldy», – dedi B. Saparbaev.
Saltanatty rásimnen keıin «SHQO – otbasynyń demografıalyq damýyna jáne ómir súrýine qolaıly aımaq» taqyrybynda forým ótkizildi. Forýmǵa kelgen QR Densaýlyq saqtaý jáne áleýmettik damý mınıstri Tamara Dúısenova eldegi jalpy demografıalyq ahýal týraly naqty málimet berdi. «İshki kóshi-qonnan bólek, shetten kelgen qandastardyń 21 % OQO, 16 % Almaty, 13 % Mańǵystaý, 9 % Jambyl oblystaryna kóship kelse, qalǵan 40% ózge 11 oblystarǵa qonys aýdarǵan. Demek, halyqty jumys kúshi mol sanalatyn ońtústik aımaqtardan jumys kúshi tapshy aımaqtarǵa kóshirý memlekettik mańyzǵa ıe», – dedi T. Dúısenova. Óz kezeginde sóz alǵan Tarbaǵataı aýdanynyń ákimi Dildábek Orazbaev aýdanda halyqtyń jetispeýshiligi sýarmaly jerlerdi ıgerý máselesin týyndatyp turǵanyn aıtty. D. Orazbaevtyń aıtýynsha, Tarbaǵataı aýdanynyń halqy 1991 jyldan beri eki esege azaıǵan.
Forýmda kóship kelgen kásipkerler másele tóńireginde oıymen bólisti. Kásipkerlerdiń usynystaryn muqıat tyńdaǵan B. Saparbaev oblysqa ózge aımaqtardan jer ıgerý mamandary tartylatynyn aıtty. «Odan bólek, «Serpin» baǵdarlamasy boıynsha Rıdder agrarlyq-tehnıkalyq kolejine Almaty, Qyzylorda oblysynan kelgen 25 stýdent bilim alýda. Olar da tolyq jataqhanamen qamtylyp, aı saıyn shákiraqylaryn alyp otyr. Sátin salsa, osyndaı ıgi jumys kelesi jyly SQO, Pavlodar, Qostanaı oblystaryna da qolǵa alynatyn bolady», – dedi B. Saparbaev.
