Reseı prezıdenti Vladımır Pýtın Tegerandaǵy resmı sapary barysynda 2015 jyly Iranmen jasaǵan ıadrolyq kelisimdi qoldaıtynyn aıtyp, Sırıa qaqtyǵysy máselesinde Iranmen yntymaqtastyqqa oń kózben qaraıtynyn málimdedi, dep jazady Qamshy.kz aqparat agenttigi.

Pýtın Iran astanasyna 1 qarashada Reseı, Ázirbaıjan jáne Iran elderi arasyndaǵy saýda, transport jáne energetıka salalaryndaǵy yntymaqtastyq máseleleri boıynsha kelissózder júrgizýge kelgen.

Alaıda Pýtınniń Iran prezıdenti Hassan Roýhanımen jáne rýhanı kósem aıatolla Álı Hameneımen arasyndaǵy kelissózinde Iran men álemdik derjavalar arasynda jasalǵan ıadrolyq kelisim jáne Sırıadaǵy azamattyq soǵys máselesi de qozǵaldy.

Reseı – Tegerandaǵy ıadrolyq baǵdarlamany toqtatý maqsatynda tarıhı ıadrolyq kelisimge qol qoıǵandardyń biri. AQSH prezıdenti Donald Tramp ótken aıda Iranmen jasalǵan kelisimdegi “salmaqty kemshilikter” túzelmese, ony qabyldaýdan bas tartatynyn málimdegen. Eýropa Odaǵy men kelisimge qatysqan basqa da elder - Reseı, Ulybrıtanıa, Qytaı, Fransıa men Germanıa Trampty AQSH-ty kelisimnen shyǵarmaýǵa shaqyrǵan.

. Sırıa týraly aıtqan Pýtın Iranmen osy sala boıynsha yntymaqtastyqty "óte nátıjeli" dep baǵalaǵan. Pýtınniń sózinshe, Máskeý men Tegeran "Sırıa máselesinde óz ustanymdaryn úılestire aldy".