Elbasy Joǵary Eýrazıalyq ekonomıkalyq keńestiń otyrysyna jáne onyń qorytyndysyna arnalǵan birlesken baspasóz máslıhatyna qatysty dep habaraıdy "Aqorda".

Otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Belarýs Prezıdenti Aleksandr Lýkashenko, Armenıa Prezıdenti Serj Sargsán jáne Qyrǵyzstan Prezıdenti Almazbek Atambaev qatysty.

Memleket basshylary Eýrazıalyq ekonomıkalyq odaqty 2015 jyldan bastap iske qosý jáne onyń sheteldik seriktestermen ózara yqpaldastyǵy máselelerin qarastyrdy.

Otyrys barysynda memleket basshylary EAEO organdarynyń qyzmetin reglamentteýge, Odaq Soty men Komısıasyn qurýǵa jáne onyń jumysyna, sondaı-aq T.Mansurovty Eýrazıalyq ekonomıkalyq komısıanyń Energetıka jáne ınfraqurylym jónindegi alqasynyń múshesi (mınıstr) etip taǵaıyndaýǵa baılanysty birqatar sheshimderge qol qoıdy.

Sonymen qatar, prezıdentter 2014 jylǵy 29 mamyrdaǵy Eýrazıalyq ekonomıkalyq odaq týraly shartqa Qyrǵyzstan Respýblıkasynyń qosylýy týraly shartqa qol qoıdy.

Qazaqstan Prezıdenti otyrys qorytyndysy arnalǵan baspasóz máslıhatyndaǵy sózinde 2015 jyl tarıhqa eýrazıalyq yqpaldastyqtyń jańa kezeńi retinde kiretinine toqtaldy.

– Kelesi jyldyń 1 qańtarynan bastap Eýrazıalyq ekonomıkalyq odaq týraly shart kúshine enedi. Eýrazıanyń ulanǵaıyr keńistiginde tuńǵysh ret erikti, teńquqyly jáne ózara tıimdi negizde qýatty tabıǵı jáne resýrstyq áleýeti, jahandyq jáne óńirlik aýqymda strategıalyq mańyzdy kólik, energetıka jáne tehnologıalyq júıesi bar ekonomıkalyq birlestik qurylady, – dedi Memleket basshysy.

Nursultan Nazarbaev elderimiz HHİ ǵasyrtyń syn-qaterlerine jaýap bere otyryp, ekonomıkalyq áleýetti biriktirgenin atap kórsetti.

– Eýrazıalyq ekonomıkalyq odaq eń aldymen qarapaıym adamdar men olardyń múddeleri úshin quryldy. Baltyqtan Tynyq muhıtyna deıingi, Arktıkadan Tán-SHanǵa deıingi orasan keńistikte Odaqqa múshe memleketterdiń 180 mıllıonǵa jýyq azamattary bıznes júrgizýge, erkin saýda men jumyspen qamtylýǵa, komýnıkasıalardy paıdalanýǵa, óńiraralyq yntymaqtastyq pen ózara gýmanıtarlyq yqpaldastyqty  keńeıtýge teń múmkindikter alady. Berik ekonomıkalyq irgetas qurý arqyly biz elderimiz ben halyqtarymyzdyń arasyndaǵy dostyqty, tatý kórshilik pen senimdi nyǵaıtamyz, – dedi Qazaqstan Prezıdenti.

Memleket basshysy qatysýshy elder búginde tatýlyqtyń, kelisimniń, ózara paıda men qoldaýdyń  uzaq merzimdi baǵytyn tańdaǵanyna nazar aýdardy.

– Ekonomıkalyq turǵydan yqpaldasa otyryp, biz saıası egemendiktiń, mádenı táýelsizdiktiń jáne halyqtarymyzdyń tildik biregeıliginiń myzǵymas qaǵıdattaryn nyǵaıtamyz. Sonymen birge, álemdik naryqtardaǵy turaqsyzdyq, sanksıalyq saıasat, álemniń jetekshi derjavalary arasyndaǵy senimniń álsireýi, saıası ahýaldyń ýshyǵý qaýpi Eýrazıalyq ekonomıkalyq odaqtyń qalyptasý úderisine yqpal etetin bolady. Biz bul syn-qaterlerdiń bárin eskeremiz, – dedi Nursultan Nazarbaev.

Qazaqstan Prezıdenti eýrazıalyq ekonomıkalyq yqpaldastyq ıdeıasyn júzege asyrýǵa atsalysqandardyń barlyǵyna rızashylyǵyn bildirdi.

– Bizdiń odaq qurýǵa bastaǵan jolymyz eki onjyldyqqqa sozyldy. Ol meniń 1994 jyly M.Lomonosov atyndaǵy MMÝ-de sóılegen kezimde usynylǵan ıdeıadan naqty is júzindegi sheshimge aınaldy. Árbir elimizdiń ulttyq múddeleleri, ekonomıkalyq múmkindikteri eskerilgen barlyq qajetti memleketaralyq qujattardy daıyndaý úshin orasan jumys atqaryldy. Munyń ar jaǵynda sarapshylardyń, saıasatkerlerdiń, depýtattardyń, bıznes pen memleketterimizdiń jurtshylyq ókilderiniń zor eńbegi tur, – dedi Memleket basshysy.

Nursultan Nazarbaev EAEO qyzmetiniń sharttaryn jetildirý jónindegi jumystardy jalǵastyrý qajettigin aıtty.

– Biz yqpaldastyǵymyz ózge memleketter úshin ekonomıkalyq seriktestiktiń tartymdy úlgisine aınalyp, EAEO-qatysýshylar sany ulǵaıýy úshin bárin jasaýǵa tıispiz. Bizdiń ekonomıkalyq odaq – álemniń barlyq yqpaldastyq birlestikterimen, sonyń ishinde Eýropalyq odaqpen de ózara tıimdi yntymaqtastyq úshin ashyq uıym. Elderimizdiń barsha azamattaryn Eýrazıalyq ekonomıkalyq odaqtyń qurylýymen quttyqtaımyn, - dedi Qazaqstan Prezıdenti.