Byltyrǵy jyl Pavlodar oblysyndaǵy bas shyrshanyń bas shaıqar baǵasy birazymyzdy tań qaldyryp edi. Qyzyljar basshylyǵy quny 38 mıllıon teńge turatyn shyrshany qalanyń qaq tórine ornata salǵan. Al bıyl barlyq oblys ortalyqtary «Jańa jyl» degende aqshany japyraqtaı shashyp jatyr...
Jaqynda shyraıly Shym qalanyń shyrshaǵa degen kózqarasy kúrt ózgerdi. Byltyr ǵana Qazaqstandaǵy eń arzan shyrshamen osy óńir jańa jylyn toılaǵan. Ákimderi bolsa ádettegideı jańa jyldyq daıyndyqty 16-jeltoqsannan keıin bastaımyz dep alty Alashtyń alqaýyna bólengen. Degenmen Ońtústik úshin bıylǵy jyl ózge notada bastaldy. Keıbir derekkózderi boıynsha jańa jyl qarsańynda quny 46 myń AQSH dollary turatyn shyrshany bir emes úsh jerge ornalastyrǵan. Megapolıske aınalýǵa yntaly qalaǵa bundaı qarjy túk te emes shyǵar, biraq aldyńǵy úndeýler qaıda qaldy? Oblystyń qadiri quny qymbat shyrshamen ólshene me?
Bir qyzymnan bir qyzymdiki soraqy. Bıylǵy jyl jemqorlyqpen aty shyqqan Qaraǵandy óńiri jańa jyldyq merekege 200 mıllıon(199 mıllıon) teńge qarajat bólipti. Qala kóshelerin kóriktendirýge,shyrsha ornatýǵa, jańa jyldyq bezendirý jumystaryna osyndaı soma shyqsa kerek. Bul qarajattyń qomaqtylyǵy sondaı Shymkenttiń shyrshalary men Pavlodar «elkalarynyń» qosyndysynan 4 esege kóp. Bıylǵy oqý jylynyń basynda Qaraǵandy oblysynda aýyldyq okrýgtegi 8 mektep jabylǵan bolatyn. Basty sebebin basshylyq: «Muǵalimderdi turaqty jalaqymen qamtamassyz ete almaımyz,»,-depti. Bala sanynyń azdyǵyna baılanysty dep te joramaldaıdy keıbiri. Aryz aıta barǵan ata-ana «aýdan ortalyǵyndaǵy ınternatta oqytyńdar» degen qysqa jaýap estip qaıtypty. Jańa jylǵa 200 mıllıon bólgen oblysta oqýshy men oqytýshynyń jaǵdaıy jasalmaý aqylǵa syımaıdy. Sonda Elbasynyń joldaýy jolda qalǵany ma? Bizdiń bolashaǵymyz bilimdi urpaq demedi me? Sońǵy 3 jylda Qaraǵandy qalasynda bala baqsha ashyldy degendi eshkim estimepti. Al kezekte turǵan búldirshinder sany - 13 000. Ákimshilik ókilderi shyrshanyń shyǵynyn qalanyń 80 jyldyq mereıtoıynyń qarsańynda uıymdastyrylyp jatqan sharalarmen baılanystyrady. 80 jyldyqty sekeńdegen «snegýrochkasymen» emes, jabylǵan 8 mektebin qalpyna keltirý arqyly toılasa ıgi edi.
Eseptep qarasańyz, bul qarajat Qaraǵandy úshin naýyryz aıynda sýǵa kómilgen Kókpekti aýylyn túgelimen jańalaýǵa ketken qarjymen parapar. Oblysta qansha múgedek bar? Úısiz-kúısiz júrgen jas otbasylar qanshama? El alańdap, Elbasy sabyrǵa shaqyryp otyrǵan «krızıs» qalaı bolady?
Bul máseleler Táýelsizdik merekesin jetim qyzdyń toıyndaı ótkizgen Qaraǵandy basshylyǵyna «qyzyq emes» bolsa kerek. Álde Baýyrjan Ábdishev, Serik Ahmetov syndy Qaraǵandylyq "azamattardyń" qataryn kóbeıtpek pe?
Orynbasar Baqytbek
