Belgıalyq rıeltor Qazaqstan úkimetiniń resmı ókili satyp alǵan, quny 65 mıllıon eýro turatyn páterdi kórsetti. Broker Ignas Múvıssen Sputnik Qazaqstan agenttigine bergen suhbatynda Qazaqstannyń asa tanymal ári baı tulǵalarymen buryn da jumys istegenin aıtyp bergen, dep habarlaıdy Qamshy.kz aqparat agenttigi.

"Men jyljymaıtyn múlik salasynda jumys istep júrgenime 20 jyl boldy. Baı adamdarmen qarym-qatynasym jaqsy, shyny kerek, maǵan bári senetindikten, bedelim jaman emes. Iá, Qazaqstannan birneshe klıentim boldy. Negizinen postkeńestik keńistikte turatyn adamdarmen jumys isteımin. Jalpy, qazaqstandyqtar Eýropaǵa jıi kele bastady", — deıdi Ignas Múvıssen.

Rıeltordyń sózine súıensek, klıentterdiń bári birdeı kim ekenin jasyrmaıdy, degenmen Qazaqstannyń bılik ókili páterdiń burynǵy ıesimen qupıa túrde kezdesken. Múvıssenniń aıtýynsha, rıeltor arqyly páter satyp alǵan adammen qazir baılanysý múmkin emes.

"Meniń atymdy Gýglǵa jazyp qarasańyz, buryn jumys istegen adamdardy kóre alasyz. Biraq klıentimniń atyn qupıa túrde qaldyrǵysy kelgenin qurmetteımin. Bul onyń ózi jáne otbasy úshin mańyzdy. Satyp alýshy men satýshy arasynda kezdesýdi ózim uıymdastyrdym. Birneshe saǵatqa ǵana sozyldy", — dep atap ótti Múvıssen.

Rıeltordyń aıtýynsha, qazaqstandyq pátermen birge tórt kólik satyp alypty: kúzet qyzmeti úshin eki Mercedes G, jeke paıdalanýǵa eki Maybach temir tulparyn.

"Búginde jurtshylyq aqshasyn birdeńege salyp, ınvestısıasyn saqtaý  joldaryn qarastyrady. Parıj, jalpy Eýropa – bul maqsatta taptyrmaıtyn jer. Jyljymaıtyn múlik keremet", — dep pikirimen bólisti Múvıssen.

Budan buryn habarlanǵandaı, Qazaqstan bılik ókili Fransıa astanasynda páter satyp alǵan. Páterde bes jatyn bólme, SPA jáne taǵy basqa arnaıy bólmeler bar.

Sán saltanatty úı qalanyń basty saýda kósheleri ornalasqan "Altyn úshburysh" aýdanyndaǵy Avenú montende, Elıseı alańyna jaqyn jerde oryn tepken. Terezeden áıgili Plaza Athénée bes juldyzdy qonaq úıi kórinip tur.

"Burynǵy ıesi birneshe páterdi qosyp, keńeıtken. Satqan adam ıntererdi jóndeýge 100 mıllıon eýro jumsapty. Kúzet qyzmeti eki jyldan beri jumys istep keledi. Páter negizinen dostarymen kezdesip, bas qosýǵa arnalǵan. Qazaqstandyq satyp alýshy meniń bedelimdi jaqsy biledi, sondyqtan tez arada kelisim jasadyq", — dedi Ignas Múvıssen.