Almatyda 2 baldyq jer silkinisi boldy dep habarlaıdy Qamshy.kz aqparat agenttigi Caravan.kz-ke silteme jasap.
Almaty turǵyndary úshin jer silkinisi taqyryby árkezde de mańyzdy. Kóp jyldar boıy qatty jer silkinisiniń saldary qandaı bolýy múmkin ekendigi jáne qala oǵan daıyn ba degen taqyryp qyzý talqylanyp keledi.
Prohunt.kz portalynyń málimetinshe, Almaty jer silkinisi jıi bolatyn 3 qalanyń birine kiredi. Almatydan bólek kóshbasshy úshtikte Bishkek jáne Katmandý qalalary bar. Sarapshylar Almatyda qatty jer silkinisi bolsa qandaı jaǵdaı oryn alýy múmkin ekenin boljap kórdi.
2008 jyly «Almaty qalasynyń jer silkinisi bolý qaýpin zertteý basqarmasynyń» ótkizgen halyqaralyq semınarynda japondyq sarapshy Segava Súke birneshe boljamdarymen bólisken.
- 1887 jyly 8-den 9 balǵa deıin bolǵan Vernyıdaǵy jer silkinisi. Tabıǵı apat saldarynan 236 adam kóz jumdy.
- 1889 jyly jer silkinisi 7-den 9 balǵa deıin bolǵan Shelek jer silkinisi.
- Kemın jer silkinisi 1911 jyly boldy. Tabıǵı apat 8-den 9 balǵa deıin boldy. Sonyń nátıjesinde 44 adam kóz jumdy.
Segava Súkeniń oıynsha, osy úsh senarıdiń biri Almatyda qaıtalansa, jaǵdaı burynǵymen salystyrǵanda álde qaıda aýyr bolady.
Japon sarapshysynyń boljaýynsha, Vernyıda bolǵan jer silkinisi qaıtalansa 25 myń adam kóz jumady jáne 25 myń ǵımarat qıraıdy.
Al Shelek jer silkinisi qaıtalansa 5300 ǵımarat qulap, kóz jumǵandardyń sany 2 myń adamǵa jetedi.
Kemın jer silkinisi qaıtalansa 15400 ǵımarat qıraıdy. 10 myń adam kóz jumady.
Qala tozaqqa aınalady
2012 jyly bıofızıkalyq ekologıa ortalyǵynyń basshysy Vıktor Inúshın men «Amansaýlyq» qorynyń prezıdenti Bahyt Túmenova «Vremá» gazetine bergen suhbatynda 8-10 baldyq jer silkinisi bolsa qalada qandaı jaǵdaı ornaıtyny týraly óz boljamymen bólisti.
Vıktor Inúshınniń oıynsha, epısentr dál qalada bolady. Úıler qulaıdy. Qala boıynsha júrgizilgen gaz qubyrlary jarylyp órt bolady. Adamdardyń jartysy úıindiniń astynda qalyp kóz jumsa, qalǵan bóligi órtenip mert bolady.
Kóliktiń kóptiginen qalada keptelis bolady. Basqa qaladan eshkim kómekke kele almaıdy. Joldardyń barlyǵy jabyq bolady.
Almatydaǵy jer silkinisi Qazaqstanǵa qalaı áser etedi?
Sarapshylardyń oıynsha, Almatydaǵy jer silkinisi eldiń IT-ınfraqurylymyn tyǵyryqqa tireıdi.
Computerworld.kz portaly Qazaqstannyń statısıka Agenttiginiń málimetine súıenip Qazaqstannyń memlekettik sektorynda 1507 vedomstvalyq data ortalyq bar ekenin jazady. Onyń 1382-i Almatyda ornalasqan. Tek 50-i ǵana Astanada.
Eger Almatyda málimetterdi óńdeý ortalyqtary qıraıtyndaı jer silkinisi bolsa Qazaqstan boıynsha jumysqa qabilettilerdiń tek 125-i ǵana qalady. Onyń 50-i Astanada ornalasqan.
Sarapshylardyń oıynsha, eldiń JİÓ-ne zıan keledi. Máselen, ekonomıs Tólegen Asqarov «Mozgovoı Shtýrm» baǵdarlamasynda eldiń jyldyq İJÓ 30%-dan 50%-ǵa deıin joǵaltýy múmkin.
