Astana ákimi Elbasynyń atynan Uly Otan soǵysy ardagerlerin Jańa jylmen quttyqtady dep habarlaıdy "QazAqparat".

Qazaqstan Respýblıkasy Prezıdentiniń Uly Otan soǵysy ardagerlerin qoldaý boıynsha jalpy ulttyq aksıasy aıasynda Astana qalasynyń ákimi Elbasynyń atynan UOS ardagerlerin kele jatqan Jańa jylmen jáne Jeńistiń 70 jyldyǵymen quttyqtady.

Ádilbek Jaqsybekov Uly Otan soǵysynyń ardagerleri Raısa Safonıchevaǵa, Tezekpaı Ábdirahmanovqa jáne Vladımır Kalsınge zor densaýlyq pen bar jaqsylyqty tilep, syılyqtar tabys etti.

«Sizder soǵys jáne soǵystan keıingi jyldary qajyrly eńbekterińizben búkil halyqtyń qurmetine bólenip, keıingi urpaqqa úlgi boldyńyzdar. Qazaqstandyqtar muny máńgi jadynda saqtaıdy, árdaıym ardagerlerdi syılap, olarǵa qamqorlyq kórsetedi. Sizderge zor densaýlyq, sarqylmas qýat, uzaq jáne baqytty ómir, sizderge jáne jaqyndaryńyzǵa barlyq jaqsylyqty tileımin», - dep elorda ákimi Prezıdent Nursultan Nazarbaevtyń quttyqtaýyn ardagerlerge oqydy.

Ardagerler Memleket basshysyna qamqorlyǵy men yqylasy úshin alǵystaryn bildirdi, dep habarlady elorda ákimdiginiń resmı saıtynan.