SHQO ákimi Danıal Ahmetov aldymen Uly Otan soǵysynyń ardageri Qabdý Karmenovtyń úıine baryp, 97 jastaǵy ardager-qarıany quttyqtady. Marqakól aýdanynda dúnıege kelgen ardager soǵysqa deıin aýyldyq Keńestiń hatshysy qyzmetin atqarǵan. Soǵys kezinde Belorýssıa, Ýkraına dalasynda maıdanger bolyp, Berlınge deıingi joldy júrip ótken. Elge oralǵannan keıin AÁD sabaǵynan tálimger bolyp bastap, Boran sovhozynda basshylyq etken. Qabdý qarıa soǵysqa qatysqany úshin İ dárejeli Otan soǵysynyń Ordeni jáne «Germanıadaǵy Jeńis úshin» medalimen birge, beıbit ómirde atqarǵan jemisti eńbegi úshin «Qurmet belgisimen» jáne Lenın Ordenimen marapattalǵan. Jubaıy 94 jastaǵy Záken Sahanovamen birge 10 balany tárbıelep ósirip, 22 nemere, 4 shóbereniń qyzyǵyn kórip otyr. Elbasynyń ardagerlerge degen yqylasyna tánti bolǵan qarıa Memleket basshysynyń Uly Otan soǵysynyń 70 jyldyǵy qarsańyndaǵy jańa jyldyq quttyqtaýyna alǵysyn jetkizdi. «Jalǵyz 9 mamyrda ǵana emes, árdaıym Elbasynyń nazarynda bolǵanymyz bizdi shyn júrekten qýantady», – dedi ardager qarıa. Osydan keıin óńir basshysy soǵys ardagerleri Tatána Pımenova, Dmıtrıı Moskalsov, Nadejda Kolobovanyń úıine baryp, Elbasynyń quttyqtaýyn tabystady. Quttyqtaý hatpen qatar, ardagerlerdiń barlyǵyna Elbasynyń ómirbaıany týraly kitap, merekelik dastarhanǵa arnalǵan sebet toly syı-sıapat pen «aıpad» tabys etildi. Oblys ákimimen bolǵan suhbat barysynda ardagerler Memleket basshysyna degen qurmettiń erekshe ekenin aıtyp, jasalyp otyrǵan qamqorlyqqa alǵystaryn bildirdi. «Kóshbasshymyzdyń ardagerlerge kóńil bólip, arnaıy quttyqtaý joldap otyrǵany bizdi erekshe tebirentti. Kóp ulttyń basyn biriktirip, biregeı memleket quryp otyrǵan Nursultan Ábishulynyń eńbegi erlikpen para-par. Biz Elbasymyzǵa sheksiz alǵysymyzdy bildiremiz», − dedi Dmıtrıı Moskalsov. Budan ózge oblys ákiminiń orynbasarlary men qala, aýdan ákimderi óńirdiń barlyq aýdandary men qalalarynda turatyn 642 ardagerdiń shańyraǵyna baryp, Elbasynyń merekelik quttyqtaýyn tabystady.