Sońǵy 2-3 jyl kóleminde qazaqtyń tól óneri aıtystyń basynan sor arylmady. Bir kezde bılik aıtysty kógildir ekrannan alyp tastaǵan edi, endi aıtystyń jańa “janashyrlary” paıda bolyp, aıtysy din men saıasattyń quraly etip, til kespekke deıin barýda...
«Qýyrdaqtyń kókesin túıe soıǵanda kóresiń» demekshi, «janashyrlyqtyń» kókesin, laqpa aıtystan kórdik. Elorda da «Juldyzdar aıtysady» atty aıtyssymaq shoý ótkizip, aıtyskerler men ánshi-ártisterdi aıtystyryp qoıyp máz bolyp otyrǵandardy kórdik. Mine, qazaqta budan ótken masqara bolmas. Ulyqpan shyqty gıtarasymen, Qanat Áljapparov aýyzyn birese dombara qylyp, birese ańgime aıtyp, birese óleń aıtyp laǵyp ketti, al aıtyskerler bolsa kádimgi aıtysta otyrǵandaı aıtysyp otyr. "Juldyzdar aıtysy" tóreshileriniń biri Bekbolat Tileýhan bolsa, Abaıdyń kezinde de laqpa aıtys bolǵanyn aıtty.
Múmkin, Bekeń aıtqandaı ol kezdede laqpa aıtys bolǵan shyǵar. Degenmen dál qazirgideı eldi aýyzyna qaratqan aıtysker aqyndar men taǵy bir ónerdiń ıesi aıtysyp, ekeýi eki jaqqa laqpaǵany, búgingideı óleń degenniń ne ekenin túsinbeıtin adam aqynmen aıtysyp otyrmaǵany anyq. Bolsa "Birjan men Saranyń" emes, áldebir tókpe aqyn men laqpa aqynnyń aıtysy bizge jetken bolar edi. Shoý jasaımyz deıdi, biz aıtyssyz-aq shoýǵa jarymaı júrmiz be?! Ánshi, ártissiz de aıtystyń óz kórermeni ózine jetedi, aıtystyń deńgeıine syn aıtqyzbas aqyndarymyz da jetedi, aıtyskerlersiz de kúndelikti shoýymyz bolyp jatyr. Endi kelip aıtysqa oıyna kelgenderin tyqpalap, kim kóringendi ákelip sarytyp ketetin las ortaǵa aınaldyryp ne kerek? Aıtysqa, óleńge bir taban jaqyndyǵy joq, óleńniń ısi murynyna barmaıtyn adamdy aıtyskermen aıtystyryp qoıý – aıtyskerlerdi qorlaý, al aıtyskerdi qorlaý, ol – aıtysty qorlaý. Ókinshke oraı, qazirgi kúnde keı aıtyskerlerimiz aıtysty da, ózin de qorlap júr.
Aıtysty qaıta tiriltip, jandandyrǵysy kelgender janazasyn shyǵaryp tynbasa boldy. Ult rýhanıatyna jasalǵan mundaı qıanattyń der shaǵynda tizgindelgeni jón. Shyn janashyr bolsa el ishinde tanylmaı júrgen talanttar men jas jetkinshikterdi halyqqa tanytyp, qazaqtyń qasıetti aıtysyn «NurOtanǵa» emes ultqa qyzmet qylǵyzsyn!
Aıtysty mazaqqa aınaldyrý - qazaqty tabanǵa taptaý, ulttyń uly qundylyǵyn oıynshyq qylý. Oǵan áste jol berýge bolmaıdy.
Turdybek Qurmethan
