«Mıss Qazaqstan-2013» baıqaýynyń jeńimpazy Aıdaı Isaeva Qazaqstannyń namysyn «Álem arýy-2014» sulýlyq baıqaýynda qorǵaıdy. «Álem arýy-2014» baıqaýy 25 qańtarda AQSH-tyń Maıamı qalasynda ótedi. Baıqaý bıyl 63-ret dástúrli túrde ótkeli jatyr jáne álemniń 125 eliniń sulýy baıqaýda baq synamaq. Qazir sulý boıjetken Maıamı qalasynda baıqaýǵa qyzý daıyndyq ústinde. Aıdaı kúndelikti áleýmettik jelilerde óziniń daıyndyq kezindegi sýretterin jarıalap otyr. Daıyndyq óte qarqyndy júrip jatqan kórinedi.

Aıdaı Isaeva Shymkent qalasynyń týmasy jáne Asfendıarov atyndaǵy Qazaq ulttyq medısına ýnıversıtetiniń túlegi. Qazirgi tańda ol Almaty qalalyq №1 emhanada otbasylyq dáriger bolyp qyzmet etedi. Baıqaýǵa baılanysty emhana basshylyǵy boıjetkendi jumystan bosatyp, 3 aıǵa aqysyz demalysqa shyǵarǵan. Baıqaýǵa deıingi 3 aıda Aıdaı ýaqytyn fıtnes zaldarǵa, telearnalarǵa suhbat berýge, aǵylshyn tilin úırenýge arnady jáne baıqaýǵa qyzý daıyndaldy. Sondaı-aq, «Álem arýy» baıqaýynda kıetin kóılekterin sulýǵa otandyq dızaınerler Aıda Kaýmenova jáne Naıl Baıkýchýkov arnaıy tikti.

Sulý boıjetken osyǵan deıin «Shymkent arýy», «Ýnıversıtet arýy», «Mega arýy», «Almaty arýy», «Qazaqstan arýy» syndy sulýlyq baıqaýlaryna 17 jasynan bastap qatysyp, baǵyn synaǵan. «Álem arýy» Aıdaıdyń qatysyp jatqan on birinshi baıqaýy. Endi arýymyz «Álem arýy» baıqaýynyń úzdik ondyǵyna kirýdi kózdep otyr.

«Árıne, jeńis mende bolady dep artyq aıtqym kelmeıdi. Biraq, elime barymdy salýǵa  ýáde beremin. Ózime artylǵan úmitti aqtaýǵa barynsha tyrysamyn. Negizgi maqsatym – úzdik ondyqtyń qatarynan kóriný»,-dep arýymyz bir suhbatynda habarlaǵan bolatyn.

Ǵalamshardyń eń sulý qyzy 25 qańtarda aqtyq synda belgili bolady. Konkýrs barysy 200 elde tikeleı efırde kórsetiledi. Jeńimpazǵa tájdi «Venesýela arýy» atanǵan Gabrıela Isler kıgizedi.

Osyǵan deıin Qazaqstannyń namysyn qorǵaýǵa barǵan sulýlarymyzǵa jeńis buıyrmady. Osy oraıda Aıdaı Isaevaǵa sáttilik tileımiz jáne arýymyz jeńis tuǵyrynan kóriner degen senimdemiz.

"Baıstars"