Lıvıada adamdardy quldyqqa satyp jatqan vıdeony CNN telearnasy jarıalady dep habarlaıdy Qamshy.kz aqparat agenttigi.

 «800, 900, 1000, 1100.  1200-ge satyldy (lıvıalyq dınar, orta eseppen 800 AQSH dollary)», — deıdi aýksıondy júrgizip otyrǵan adam.

Kadrden satylymǵa túsken qara násildi jigitti fermada jumys isteýge jaraıtyndaı densaýlyǵy men kúshi bar adam retinde tanystyrǵanyn baıqaýǵa bolady.

Lıvıada adam saýdalaıtyn qara bazardyń baryn kóshi-qon jónindegi Halyqaralyq uıym sáýirde habarlady. Uıymnyń málimetinshe, Lıvıada júzdegen adam quldyqqa satylǵan.

Ortalyq Afrıkadan Eýropaǵa qashpaq bolǵandardy tiri taýar retinde Lıvıanyń birneshe qalasynda satyp otyrǵan.

Mıgrant tasymaldaýshyǵa Eýropany aralatýǵa aqsha beredi. Olar Lıvıaǵa jetkende bergen qarjysy jetkiliksiz ekenin aıtady. Eger ol kelisim boıynsha júrýin talap etse ony uryp-soǵyp, zorlaıdy. Odan keıin saýdaǵa salady.

Bizdi qorapqa salǵandaı tyǵyndap tastaıdy. Uıyqtaı almaımyz. Kóbi túrli aýrýmen aýyrady. Bizge tamaq jetispeıdi. Bizdiń dýsh qabyldamaǵanymyzǵa  birneshe aı boldy. Eger biz bul jerden qashyp shyqpasaq, barlyǵymyz ólemiz. Adam qaldyǵymen birge tunshyǵyp edende jatamyz» dep quldyqta bolǵandardyń biri jaǵdaıdy baıandap berdi.

Kúzetshiler únemi bosqyndardy soqqyǵa jyǵady. Olar elektroshokerdi de paıdalanatyn bolǵan. Tamaq, sý suraǵan adamdardy sonymen jazalaıdy.

Áıel bosqyndardyń  biri ony belgisiz bir úıge alyp ketkenin jáne ol jerde úsh er adamnyń bolǵanyn aıtady. Olardyń arasynda kóshi-qon máselesimen aınalysatyn qyzmetker de bar. «Olar meni zorlady» deıdi quldyqta bolǵan áıel.

Lıvıalyq sheneýnikter utymdy bıznes júrgizip otyr. Para bergenderdi quldyqtan bosatady. Mıgranttar tıelgen keme neıtraldy zonaǵa shyqqanda Lıvıanyń jaǵajaı kúzetshileri qaıyqty basyp alyp, mıgranttardy qaıta lagerge ákeledi.

BUU baqylaýshylary aıdyń basynda Trıpolıdegi  mıgranttardy ornalastyrý  ortalyqtarynyń birnesheýine bas suqqan edi. Olar sonda kórgen sumdyqtardy sózben jetkizý múmkin emes ekenin aıtady.

«Myńdaǵan júdeý tartqan jaraly er adamdar, áıelder men balalar. Olardy angarǵa qamap qoıǵan. Qarapaıym adamǵa qajettiniń ózi joq. Olardy adamdyq abyroıdan aıyrý úshin barlyǵyn jasaǵan» delingen BUU baıandamasynda. 

«Bul jaǵdaı naǵyz apatqa aınaldy. Halyqaralyq qaýymdastyqtar buǵan kóz juma qaraı almaıdy» dedi adam quqyǵy jónindegi komısar Zeıd Raad al-Hýseın Brússeldegi pres-konverensıada.