Ózin juldyz sanaıtyn ánshiler únemi erkelikterin kórsetkisi keledi. Máselen, ataqty ánshi Selın Dıon barǵan jerinde bólmesiniń terezesi taýǵa qarap turǵanyn talap etse, al pop - juldyz Bıonse bolsa, taza aýyz sý men kishkentaı qyzyna jyljymaly tósektiń bolýyn mindetteıdi. Al bizdiń ánshilerdiń talaptary qandaı?
Qazaq ánshileri toıǵa barǵanda qandaı talap qoıady? Qymbat qonaqúı, bıznes klasstaǵy ushaq, etti taǵamdar. Bul ánshi Qaırat Nurtastyń uıymdastyrýshylarǵa qoıatyn basty talaby.
Raıderlik talaby shet eldikterden de kem emes. Terezesi taýǵa qarap turmasa da qymbat qonaqúıdiń bolýy shart. Ushaqtan túsken kezde sý jańa ári ishi tap - taza kólikke jaıǵaýy tıis.
"Sol jerdegi qonqúıdiń lúks komnatasyna turaqtaıdy. Bólmede ishimdik bolmaýy tıis", - deıdi Qaırattyń anasy ári prodúseri Gúlzıra Aıdarbekova.
Bir kúnde tórt konsert, al bir jeksenbide alty toıǵa baryp úlgeretin juldyz qasyna bir oqqaǵar men kómekshisin mindetti túrde ózimen birge alyp júredi eken.
Degenmen, Qaırattyń anasynyń aıtýynsha, uıymdastyrýshylarǵa shart qoıa bilýi úshin de ánshiniń sol talapqa saı bolýy kerek.
"Halyqty jınaý úshin birinshi jaqsy ánder kerek. Áıteýir konsert berdi eken dep eshkim kele bermeıdi ǵoı. Birinshi jaqsy án shyqpaı, sen eshqaıda bara almaısyń", - dedi Gúlzıra Aıdarbekova.
Qaırat tanymaldylyqqa ıe bolmaı turyp, talaı qarapaıym sahnalarda án shyrqaǵan kórinedi. Tipti tehnıkalyq jabdyqtardan ada qalǵan jerlerde jandy daýyspen tegin án shyrqap, ataq pen bedeldi sondaı aýyl - aımaqtan jıǵanyn aıtady
Al úsh jyl buryn qurylǵan "Shamshyraq" tobynyń ónerdegi hıkaıalary tipten qyzyq. Talap qoıǵysy kelgenimen de ol kóp jaǵdaıda oryndalmaıdy. Ásirese, toıǵa barǵanda aqsha ornyna tórt túliktiń birin qushaqtap qaıtady eken.
Toptyń mundaı jaǵdaıǵa tap bolýynyń basty sebebin ánshilerdiń ózderi de biledi. Talap qoımaǵannyń kesiri. Al Halyq ártisi Roza Rymbaevanyń uly Álı Oqapov eń talapshyl ánshilerdiń qatarynan bolyp shyqty.
"Álıdi basqa qalaǵa shaqyrǵanda aldymen ushaq bolýy tıis. Ekinshiden qonaqúı, tamaq, kólik. Suraıtyny sol", - deıdi Álıdiń pıar – dırektory Erlan Álimov.
Negizgi uıymdastyrýshylarǵa ánshiniń basty talabyn jetkizetin jigittiń esimi - Erlan Álimov. Buryn toptardyń birinde án aıtqan jigit qazir Álıdiń kómekshisi. Iaǵnı, raıderi. Sondyqtan bolar, ánshi eshqashan aldanyp kórmepti.
"Raıderde jazylǵan negizi gonorardyń jartysy tólenedi. Jartysy toıdyń aldynda nemese ushyp kelgen ýaqytta tólenedi, tek toıdan keıin emes",- dedi Álı Oqapovtyń pıar-dırektory.
MýzART toby men ánshi Aıqyn Tólepbergenovtyń talaptary birdeı. Olar bastysy tehnıkalyq aparatýralardyń myqty bolýyn nazarda ustaıdy eken.
"31 telearna"
