Ótirikshi qaıdan shyqty?
Bala kezinde siz ony oınatyp jatyrmyn dep, mán bermeı, aldaı beretinsiz. Qolyńyzda joq bolsa da, "balam beri kelshi shokolad beremin",- dep ótirikti kóp aıttyńyz. "Qaıda kettiń?"- dep esikten jylap, shyǵaryp salyp turǵan balańyzǵa "qazir kelemin",- dep uzaaaq is- saparlarǵa kete beretinsiz. Sóıtip, balanyń boıyna ótirikti darytyp, qoǵamda ýádesinde turmaıtyn taǵy bir ótirikshiniń kóbeıýine úles qostyńyz.
Paraqor qaıdan shyqty?
Qandaıda bir jetistikke jetken balaǵa syılyq berip, jyly sóz aıtyp, arqasynan qaǵýdyń artyqtyǵy joq. Biraq, siz balańyzǵa kóbinese syılyqty kelisim shartpen alýdy úırettińiz. Máselen, "balam sabaqty jaqsy oqysań velosıped alyp beremin nemese mýsordy tógip kelseń kámpıt beremin",- degen sózderdi aıtý arqyly qoǵamda syıaqy almasa ónimdi jumys jasamaıtyn taǵy bir paraqordy daıyndadyńyz.
Meıirimsiz qaıdan shyqty?
Balańyzdyń qolyna súıikti nársesin alyp berip, "endi ákeń jaqsy ma, anań jaqsy ma",- degen suraqty qoıý arqyly ekeýin teń jaqsy kóretin balanyń psıhologıasyn qaq aıyrdyńyz. Sol sátte keregin alyp sizge ishi jylyp turǵan balańyzdyń, "Ákem jaqsy",- degen sózin estip, máz bolǵanyńyzben, erteń dúnıesi bar adammen jyly sóılesip, dúnıesi joq adammen qol alyspaıtyn, dúnıeqońyz, meıirimsiz adamdy tárbılep jatqanyńyzdy túsinbedińiz.
Ǵaıbatshyl, ósekshi qaıdan shyqty?
Jylap jatqan balańyz jylaǵanyn qoısyn dep "meniń balam jylamaıdy, jylaı beretin kórshiniń balasy Sáken ǵoı, ol qashan kórseń eńirep otyrady",- dep bóten adamnyń syrtynan oı qalyptastyrýdy úırettińiz. Nemese, týǵan týystar jınalyp otyrǵan sátte balańyzdy shaqyryp alyp, "qane balam, Murat qalaı qoryldaıdy, Aıgúl qalaı júredi kórsetshi",- dep ózgelerdi ájýalap, mazaqtaýdy boıyna sińirip, bolashaqqa ǵaıbatshyl bir adamdy daıarlap berdińiz.
Boqaýyz qaıdan shyqty?
Mektepte birge oqyǵan klasstasyńyzdy, áskerde birge bolǵan slýjagyńyzdy t.b ázilińizdi kóteretin dostaryńyzdy kishkentaı balańyzǵa boqtatyp, qarq-qarq kúlip, tili táp-tátti náresteńizdiń beı ádep sózdi byldyrlap aıtqanyn qyzyqtadyńyzdar. Sóıtip bolashaqta aýzynan aq ıt kirip, kók ıt shyqqan, ashýy qyssa ata-anasyn da boqtap, aqylynan aýzy buryn sóıleıtin sanasyz balalardyń qataryn kóbeıttińiz
P.S Ómirdegi úlken qatelikterdiń barlyǵy - usaq dúnıelerden bastalatynyn umytpańyzdar qurmetti ata-analar!
Jandarbek Bulǵaqov
