Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov burynǵy sheneýnikterdiń elden 8 mıllıard dollardan asa aqsha alyp ketkenin aıtty, - dep habarlaıdy Qamshy.kz aqparat agenttigi Tengrinews.kz-ke silteme jasap.

"Sońǵy 10 jylda Qazaqstannan tys jerdegi 205 jemqordyń 152-si elge qaıtaryldy. Alaıda elden 8 mıllıard dollardan asa aqsha alyp ketken burynǵy mınıstrler men ákimder shetelde áli de jasyrynyp júr. Birinshi kezekte olar - Áblázovtiń uıymdasqan qylmystyq toby men Hrapýnovtar", - dedi Qaırat Qojamjarov. Astanadaǵy konferensıa barysynda.

Qojamjarovtyń aıtýynsha, olardyń barlyǵy jazalanady.

"Biz saıasattandyrýǵa qaramastan olardyń barlyǵynyń jaýapkershilikke tartylatynyna senimdimiz. Sheteldik áriptesterimizben seriktestigimizdiń arqasynda elden qashyp ketken árbir jemqor sýdıa taǵaıyndaǵan jazaǵa tartylady", - dedi Qaırat Qojamjarov. 

Onyń aıtýynsha, munda memlekettiń aqshasyn qylmystyq jolmen jumsaǵan jáne elden aqsha alyp ketkenderdiń áreketin erterek anyqtaý mańyzdy.

"Qashyp júrgen qylmyskerler men urlanǵan aktıvterdi basqa quzyretten qaıtaryp alý - árbir memleket úshin ózekti másele. Qazirgi ýaqytta álemdik qaýymdastyqta deoffshorızasıǵa jáne sheteldik banktegi esepshot ıelerine qatysty málimetterdi anyqtaý maqsatynda jedel sharalar júrgizilip jatyr. Qazaqstan mundaı sharalardy qoldaıdy jáne ózara árekettesýge daıyn", - dedi vedomstvo basshysy.

Sondaı-aq, Qaırat Qojamjarov 40-tan asa memleketpen aktıvterdi berý jáne qaıtarý týraly sharttardyń jasalǵanyn eske saldy.