Insýlttan kóz jumǵan almatylyq 48 jastaǵy er adam 3 adamnyń ómirin uzartty. Marqumnyń týysqandary onyń ishki organdaryn muqtajdarǵa berýge kelisim bergen, dep habarlaıdy Qamshy.kz aqparat agenttigi Qazaqparatqa silteme jasaı otyryp. Bul týraly A.Syzǵanov atyndaǵy ulttyq ǵylymı hırýrgıalyq ortalyqtyń baýyr transplantasıasy jáne ýrologıa bóliminiń meńgerýshisi Ravıl Ibragımov aıtty.
10 qarashada 48 jastaǵy er adam aýrýhanada ınsýlttan kóz jumǵan. Marqumnyń áıeli men týystary 2-3 saǵattyq keńesýden soń ishki organdaryn donorlyqqa berýge kelisim bergen. 2 búırek Almatyda qalsa, júrek Astanaǵa jóneltildi. A.Syzǵanov atyndaǵy ulttyq ǵylymı hırýrgıalyq ortalyqtyń baýyr transplantasıasy jáne ýrologıa bóliminiń meńgerýshisi Ravıl Ibragımov bastaǵan komanda kúrdeli otaǵa kirisip ketti.
«12-14 saǵat daıyndyqqa ketti. Marqumnyń aǵzasynan analız alyndy. Teksergen soń 2 búırek, 1 júrek alyndy. Baýyryn almadyq, sebebi baýyrynda ózgerister boldy. 1 táýlik ishinde kezekte turǵan naýqastardan da analız alynyp, sáıkestigi tekserildi. Nátıjesinde 5 jyl gemodıalız apparatyna tańylǵan 48 jastaǵy er adamǵa búırek aýystyryldy. Sosyn 1 jyl gemodıalız apparatyn jaǵalaǵan 34 jastaǵy jigittiń búıregi aýystyryldy. Ekeýi de 3 aptadan soń shyqty. Densaýlyqtary jaqsy. Gemodıalız apparatyn paıdalanbaıdy. Al júregi Astanadaǵy pasıentke salyndy. Bul oqıǵa da jaqsylyqpen aıaqtaldy», — dedi Ravıl Ibragımov.
Respýblıkalyq transplantasıa úılestirý ortalyǵynyń málimetinshe, búgingi tańda búırek aýystyrý kezeginde 2779 eresek, 51 bala tur. Al baýyr aýystyrýǵa - 549 eresek, 9 bala, júrek aýystyrýǵa - 122 eresek, 16 bala, ókpe aýystyrýǵa 11 eresek adam kezek kútip tur. Qazaqstanda eń alǵash ret búırek aýystyrý otasy 1979 jyly jasalǵan. Osy ýaqytqa deıin elde myńǵa jýyq ota jasaldy.
