«Qazaqstanda turyp, qazaq tilin, onyń dástúrin bilmeý men úshin úlken syn» degen uranmen ómir súrgen Tekeli qalasynyń turǵyny Oleg Kalınovskıı portalymyzǵa arnaıy suhbatyn berdi. Aıta keterlik, osyǵan deıin ol qazaq kúıin vıdeoǵa túsirip “Youtube” jelisine júktep júrgen-di. Az ǵana ýaqyttyń ishinde «Rýsskıı dombrıst» atanǵan Olegti qazir biraz jurt tanyp úlgerdi. Oleg búgingi kúnde shetelde oqyp jatqandyqtan, áleýmettik jeli arqyly suhbattasýǵa ǵana múmkindik boldy. Ol suhbatynda ózi jaıly biraz málimetter berip, qazaq halqynyń salt-dástúrine jaqyndyǵyn aıtty.

(Oleg «Halyqaralyq túrik tili baıqaýynyń» án baǵyty boıynsha «Altyn medal ıegeri» Jumahan Ásilovpen  birge)

– Seniń dombyraǵa degen qushtarlyǵyńdy ár qazaqtyń balasy joǵary baǵalaıdy dep oılaımyz. Bizde ulttyq aspapta oınaǵandy qoıyp, óz tilinde erkin sóıleı almaıtyn azamattar kóp.  Ultyń ózge bola tura qazaqtyń ónerine jaqyn bolýyńa ne sebep boldy?

– Men 7 synyptan bastap orta mektepti bitirgenshe Taldyqorǵandaǵy qazaq-túrik jasóspirimder lıseıinde oqydym. Ol jerde jataqhanada jatatynbyz. Lıseıde kóp ult ókilderi oqıtyn. Biraq, negizinen qazaq oqýshylarynyń sany basym boldy. Bizdiń synypta da dál solaı bolatyn. 7 synypta qazaqsha bilmeı kelgen edim. 5 jyldyń ishinde erkin sóıleı alatyn deńgeıge jettim. Qazaq dostarymmen jaqyn aralasyp, qazaqtyń dástúrimen jaqsy tanystym. Al dombyraǵa degen qyzyǵýshylyǵym alǵash ret dombyranyń dybysyn estip, óz kózimmen kórgende paıda boldy. Janyma jaqyn bolyp sezildi. Sodan beri dombyramen kúı shertip, tipti keıingi kezderi dombyramen án aıtatyn boldym.

– Qazaqtyń qara dombyrasyn qansha ýaqytta ıgerip úlgerdiń? Osy dombyrańmen qandaı jetistikterge jettiń?

– 9 synyptan bastap úırene bastadym. Bir jyldyń ishinde erkin ıgerdim desem artyq bolmas. 10 synyp bitirgen jyly «Halyqaralyq túrik tili festıvaline» dúnıe orkestrinde dombyra sherttim. «Jarqyn Bolashaq» atty respýblıkalyq baıqaýda dombyramen qazaqsha án aıtyp, oblystyq deńgeıde 1-shi oryn aldym, respýblıkalyq deńgeıge óttim.

– Jalpy qazaqtyń salt-dástúrin qalaı baǵalaısyń? Dombyradan basqa qazaqy aspapta oınaı bilesiń be nemese taǵy qandaı qazaqy ónerge jaqynsyń?

– Óte joǵary baǵalaımyn. Qazaqtyń ulttyq qundylyqtary ushan-teńiz. Men qazirge tek dombyra men ulttyq taǵamdarymen ǵana jaqynmyn.

– Jańa qazaq-túriń lıseıinde oqydym dediń. Orta mektep deńgeıi ǵoı. Joǵary bilimdi qaıda jalǵastyrmaq oıyń bar? Qandaı maman ıesi atanǵyń keledi?

– Men orta bilimdi 2014 jyly aıaqtadym. Qazir Reseıdiń Tomsk qalasyndaǵy TÝSÝR ýnıversıtetinde oqımyn. Mamandyǵym - «Ónerkásiptik elektronıka».

– Bolashaqqa qandaı josparlaryń bar? Dombyramen áli talaı bıikterden kóringiń kele me? Álde bul ónerińdi jaı hobbı retinde ǵana ustamaq oıyń bar ma?

– Qazirge eń úlken maqsatym – oqýymdy úzdik bitirý ǵana. Sebebi, munda oqý qıyn. Bos ýaqyt az bolady. Kúndiz-túni oqýǵa týra keledi. Degenmen, anda-sanda basymdy demaltý úshin dombyra shertip qoıamyn. Joǵary oqý ornyna túskeli, ókinishke oraı, hobbı retinde ǵana qalyp qoıdy.

– Qazaq ultyna sonshalyqty jaqyn ekenińdi baıqap otyrmyz. «Bolashaq jarym qazaq qyzy bolady-aý» degen oıyń boldy ma?

– Jo-joq. Bolashaq jar týraly áli oılanǵan joqpyn. Biraq ony Qudaı biledi(kúldi).

(Oleg otbasymen birge)

Suhbattasqan: Turan Mural