It jyly álem halqyn qandaı mańyzdy oqıǵalar kútip tur? Álem jáne Qazaqstan úshin mańyzdy oqıǵalardy Qamshy.kz aqparat agenttigi Sputnik Qazaqstan-ǵa silteme berip  nazarlaryńyzǵa usynady.

Álemdik saıasat

2018 jyldyń 1 qańtarynan bastap Qazaqstan BUU Qaýipsizdik keńesine tóraǵalyq etedi. Keńestiń turaqty emes músheleri bul qyzmetke kezekpen kirisedi. Tóraǵalyqtyń negizgi máselesi Ortalq Azıa men Aýǵanstan boıynsha QK qujatyn (qararlar, tóraǵanyń málimdemesi) qabyldaý bolmaq.

Sırıadaǵy ahýal bıyl da álem halqynyń basty nazarynda bolady. 2017 jyldyń sońynda Reseı prezıdenti Vladımır Pýtın sátti júrgizilgen operasıadan keıin Sırıadan reseılik áskerılerdiń shyǵarylǵany týraly málimdegen edi. Sırıa prezıdenti Bashar Asadtyń bolashaǵy, deeskalasıa aımaqtary, shıelenistiń jańa oshaqtary – osy jáne ózge de suraqtardyń jaýaby 2018 jyly belgili bolýy múmkin.

Astanada Ortalyq Azıa elderi basshylarynyń samıti ótýi yqtımal. Óńirlik memleketterdiń basshylary mundaı formatta kópten bas qospady. Alaıda SİM basshysy Qaırat Ábdirahmanov usynǵan jańa kezdesýdiń ótetini-ótpeıtini ázirge belgisiz.

Astananyń mereıtoıy 

Bıyl elordanyń 20 jyldyq mereıtoıy keń aýqymda atalyp ótetini anyq. Merekeni uıymdastyrý úshin arnaıy komısıa quryldy. Oǵan prezıdent ákimshiliginiń basshysy Ádilbek Jaqsybekov jetekshilik etedi.

Tujyrymdamaǵa sáıkes, mereıtoı úsh kezeń boıynsha atalyp ótpek: daıyndyq – 2017 jyldyń 10 jeltoqsanyna deıin, negizgi – 2017 jyldyń 10 jeltoqsanynan 2018 jyldyń 6 shildesine deıin, merekeden keıin – 2018 jyldyń 6 shildesinen 2018 jyldyń 31 jeltoqsanyna deıin.

Prezıdent saılaýy

Reseıde 18 naýryzda prezıdent saılaýy ótedi. Ne degenmen, Qazaqstan úshin kórshi memleketti kim basqaratyny mańyzdy ekeni aıqyn. Sebebi qos eldi baılanystyratyn ortaq dúnıe jeterlik. Bárinen buryn, saılaýshylarǵa prezıdent taǵyna talasatyn Ksenıa Sobchaktyń qansha daýys jınaıtyny qyzyqty bolatyn sıaqty.

Sondaı-aq, 2018 jyly Fınlándıa men Grýzıada da prezıdent saılaýy ótedi. Aıta ketsek, bıyl Grýzıada memleket basshysy sońǵy ret jalpyhalyqtyq daýys berý arqyly saılanady. 2024 jyldan bastap prezıdentti 300 ókilden quralǵan saılaýshylar alqasy saılaıdy.

Sáýir aıynda mıllıondaǵan turǵynnyń nazary Bostandyq aralyna aýady. Kýbalyq revolúsıoner ári Fıdel Kastronyń inisi Raýl Kastro 2017 jyldyń sońynda memleket basshysy taǵyn bosatatynyn málimdegen edi.

Buǵan qosa,  Moldova men Lıvanda parlament saılaýy ótedi.

Sport

Sport jarystary ár jyl saıyn úzilmeıtin dástúrli shara desek te bolady. Bıyl, ásirese, eki dúbirli doda el nazaryna ilinip otyr: Qysqy Olımpıada oıyndary men fýtboldan Álem chempıonaty.

Qysqy Olımpıada 9-25 aqpan aralyǵynda Ońtústik Koreıanyń Phónchhan qalasynda ótedi. Al fýtboldan álem chempıonaty Reseıdiń 11 qalasynda 12 stadıonda ótedi dep josparlanǵan.

Sonymen qatar, bıyl jazǵy Azıa oıyndary da jalaýyn jelbiretedi. Baıraqty báseke Indonezıa astanasy Djakarta men Palembang qalasynda ótpek.

Mádenıet

Mádenıet salasynyń basty oqıǵasy – halyqaralyq "Eýrovıdenıe" baıqaýy. Konkýrs 8-12 mamyr aralyǵynda Portýgalıa astanasy Lıssabonda ótedi.

Alaıda, qazaqstandyqtar úshin bıyl "Balalar Eýrovıdenıesi" qyzyqty bolmaq. Sebebi mýzyka baıqaýynda alǵash ret kishkentaı otandasymyz Danelıa Tóleshova baq synaıdy. Ýkraınalyq "Balalar daýysy" shoýynyń jeńimpazy Tbılısıge barady. Konkýrstyń fınaly 26 qarashaǵa josparlanǵan.